2021 йилнинг август ойида АҚШ армияси томонидан камида 1450 нафар афғонистонлик бола ота-онасисиз Кобулдан эвакуация қилинган. Бу ҳақда CNN Американинг қочқинлар ишлари бўйича бошқармаси маълумотларига таяниб хабар берди.
Телеканал журналистларининг фикрича, бу болаларнинг кўпчилиги ўз оиласи билан топиша олмаслиги мумкин. «АҚШда мингдан ортиқ афғон болалари уйсиз қолаётгани одамни ларзага солади», — дейди Калифорниядаги афғон-америкалик педиатр, доктор Сабрина Перрино эълон қилинган маълумотлар бўйича ўз фикрлари билан ўртоқлашар экан.
АҚШдаги болалар ҳуқуқлари фаолларининг айтишича, болаларнинг аксарияти Афғонистондан оиласи билан бирга қочишга уринган, бироқ чет эл қўшинлари томонидан амалга оширилган эвакуация чоғидаги чалкашликларда ота-онасини йўқотиб қўйган. Бошқалари эса 26 август куни Кобул аэропортида 200 га яқин одамни ҳалок қилган портлаш оқибатида оиласи билан алоқани йўқотган.
Расмий маълумотларга кўра, ота-онасиз АҚШга олиб кетилган 1450 нафар боланинг мутлақ кўпчилиги америкалик қариндошларининг оиласида қўним топган ёки август ойида улар билан бирга Кобулни тарк этишга муваффақ бўлган қариндошлариникида яшай бошлаган.
Шу билан бирга, Америка расмийларига кўра, болаларнинг бир қисми афғонлар ва хорижликларни мамлакатдан эвакуация қилиш бўйича халқаро операция якунланганидан сўнг Афғонистонни тарк этишга муваффақ бўлиб, АҚШдан бошпана топган ота-оналарига қайтарилган.
Аммо 250 га яқин афғон боласи АҚШ ҳукумати қарамоғида қолмоқда, дейилади хабарда.
Хорижий қўшинларни олиб чиқиш билан бирга, Афғонистондан АҚШ ва НАТО мамлакатлари фуқаролари, шунингдек, «Толибон»га қарши курашда Ғарбга ёрдам берган афғонистонликлар эвакуация қилинди. «Толибон» таъқибидан қўрққан минглаб афғонлар учиб кетишни истаган.
Эвакуация ишларининг яхши ташкил қилинмагани ва ваҳима туфайли тадбирларда ўнлаб одамлар ҳалок бўлди ва яраланди. Хусусан, 16 август куни эрталаб улар рейслардан бирортасига ўтириш учун учиш майдонига бостириб кирган ва ерда турган самолётларга осилиб чиқишга ҳаракат қилган. Ҳодиса оқибатида ўнга яқин киши ҳалок бўлган.
31 август куни «Толибон» талабига кўра, эвакуация якунланди ва барча хорижий ҳарбийлар Афғонистонни тарк этди. АҚШ Марказий қўмондонлиги раҳбари, генерал Кеннет Маккензининг айтишича, икки ҳафта ичида унинг қўл остидагилар Кобулдан 79 мингдан ортиқ тинч аҳолини, жумладан, 6 минг америкалик ва 73,5 мингдан ортиқ Афғонистон фуқаролари ва учинчи давлат вакилларини эвакуация қилишга муваффақ бўлган. Ҳаммаси бўлиб хорижий армия бўлинмалари 123 минг хорижлик ва афғонистонликларни Кобулдан ҳарбий транспорт самолётлари билан эвакуация қилган. 31 августдан кейин Америка Қатар воситачилигида 3 мингдан ортиқ афғонлар ва ўз фуқароларини Афғонистондан олиб чиқишга муваффақ бўлган.
Мавзуга доир:
Изоҳ (0)