Toshkent shahar Yunusobod tumanida 3-dekabr kuni noma’lum shaxslar xonadonlardan birida bosqinchilik jinoyatini sodir etdi. Bu haqda Toshkent shahar Ichki ishlar bosh boshqarmasi “Daryo”ga ma’lum qildi.
Xabar qilinishicha, shu kuni 7 nafar shaxs tumanning “Otchopar” mahallasidagi xonadonlardan biriga o‘zganing mulkini talon-toroj qilish maqsadida kirgan. Ular yuzlariga niqob taqib olgan holda, o‘tkir tig‘li jism bilan qurollangan.
Xonadonda uy egasi bo‘lgan ayolning bir o‘zi ekanidan foydalanib, jinoyatchilar uning qo‘l-oyoqlarini “skotch” yordamida bog‘lab, pichoq bilan tahdid qilgan va moddiy boyliklari qayerda ekanini so‘ragan.
Noma’lum shaxslar yotoqxonadagi seyfni buzib, ichidagi pul mablag‘lari bilan birga olgan. Voqea joyidan yashirinmoqchi bo‘lganda jabrlanuvchining ikki qizi Gentra avtomobilida kelib qolgan. Jinoyatchilar ularni ham majburlab olib kirgan, pichoq bilan tahdid qilib, Gentra’ga o‘tirib, hodisa joyidan yashiringan.
Toshkent shahar IIBB navbatchilik qismiga xabar berilgach, voqea joyiga tezkor tergov guruhi xodimlari yetib borgan. Olib borilgan maxsus tadbir davomida 7 nafar shaxsning kimligi ayon bo‘lgan.
Jinoyatga boshchilik qilgan shaxs bir necha oy avval shu xonadonda ta’mirlash ishlarini olib borgan usta ekani aniqlangan.
“20—25 kun ishlaganman bu uyda. Sherigim aytib qoldi ‘Seyf ko‘rdim, ichida puli bor. Bu ishni eplaydigan tanish yigitlar bor’, dedi. Men rozi bo‘ldim”.
Jinoyatchilar Gentra avtomobilini yo‘lda qoldirib, o‘zlari boshqa mashinada Toshkent shahridan chiqib ketgan. Seyfni buzib, ichidagi pulni o‘zaro bo‘lishgan. Jabrlanuvchining ma’lumotlariga ko‘ra, seyf ichida 15 ming dollar bo‘lgan. Hozirda zarar miqdorining bir qismi qoplangan.
Bosqinchilik qilganlarning shaxsi aniqlanib, barchasi tergovga keltirilgan. Ularga nisbatan Jinoyat kodeksining 164-moddasi (bosqinchilik) 4-qismi “a” bandi va 267-moddasi (transport vositasini olib qochish) 2-qismi “b, v” bandlari bilan ayblov e’lon qilinib, qamoqqa olish tarzidagi ehtiyot chorasi qo‘llanilgan.
Izoh (0)