Qamchiq dovonida 26-dekabr kuni kuchli qor yog‘ishi kuzatilmoqda. Bu haqda Favqulodda vaziyatlar vazirligi xabar qildi.
Qayd etilishicha, M-39 Guliston—Bo‘ka—Angren—Andijon avtomobil yo‘lining Qamchiq dovonidan o‘tgan qismida qor yog‘gan. Hozirda yo‘lni qordan tozalash va muzlamalar hosil bo‘lishining oldini olish ishlari davom etmoqda. Bu uchun 135 ta texnika va 340 nafarga yaqin ishchi jalb etilgan.
Yo‘llarda ko‘rinish 300 metrni, havo harorati -7 daraja, namlik 89 foizni tashkil etmoqda. Shamol tezligi — 3-8 metr/sekund.
O‘zbekistonning aksariyat hududlarida 26-dekabr kuni qor yog‘ishi kuzatildi. Avvalroq “O‘zgidromet” yakshanba kuni O‘zbekistonda havo harorati -2 daraja sovuqdan +3 daraja iliqqacha o‘zgarib turishi, Qoraqalpog‘iston, Xorazm va Farg‘ona vodiysidan boshqa barcha hududlarda yog‘ingarchilik (yomg‘ir, qor) bo‘lishi, Toshkentda yomg‘ir qorga aylanishi haqida axborot bergandi. Toshkent bo‘yicha prognoz o‘zini oqladi, ammo qor Qoraqalpog‘iston va Xorazmda ham yog‘di. Noqulay ob-havo sharoiti tufayli Taxtaqoracha dovoni yopildi, IIV Yo‘l harakati xavfsizligi bosh boshqarmasi haydovchilardan ehtiyotkorlikni oshirishni so‘ramoqda.
Avvalroq “O‘zgidromet” 26—27-dekabrda A-373 Toshkent—O‘sh avtomobil yo‘lining Qamchiq dovoni qismida qor, vaqti-vaqti bilan kuchli qor yog‘ishi, tuman tushib, ko‘rinuvchanlik 50 metrgacha pasayishi, shamol tezligi sekundiga 17-22 metrgacha kuchayishi, yo‘lda qor uyumlari, yaxvonlik hosil bo‘lishi kutilayotganini ma’lum qilgandi.
Eslatib o‘tamiz, Qamchiq dovonida 25-noyabr va 19-dekabr kunlari ham qor yog‘ish holati kuzatilgandi.
Izoh (0)