Тошкент шаҳар Юнусобод туманида 3 декабрь куни номаълум шахслар хонадонлардан бирида босқинчилик жиноятини содир этди. Бу ҳақда Тошкент шаҳар Ички ишлар бош бошқармаси «Дарё»га маълум қилди.
Хабар қилинишича, шу куни 7 нафар шахс туманнинг «Отчопар» маҳалласидаги хонадонлардан бирига ўзганинг мулкини талон-торож қилиш мақсадида кирган. Улар юзларига ниқоб тақиб олган ҳолда, ўткир тиғли жисм билан қуролланган.
Хонадонда уй эгаси бўлган аёлнинг бир ўзи эканидан фойдаланиб, жиноятчилар унинг қўл-оёқларини «скотч» ёрдамида боғлаб, пичоқ билан таҳдид қилган ва моддий бойликлари қаерда эканини сўраган.
Номаълум шахслар ётоқхонадаги сейфни бузиб, ичидаги пул маблағлари билан бирга олган. Воқеа жойидан яширинмоқчи бўлганда жабрланувчининг икки қизи Gentra автомобилида келиб қолган. Жиноятчилар уларни ҳам мажбурлаб олиб кирган, пичоқ билан таҳдид қилиб, Gentra’га ўтириб, ҳодиса жойидан яширинган.
Тошкент шаҳар ИИББ навбатчилик қисмига хабар берилгач, воқеа жойига тезкор тергов гуруҳи ходимлари етиб борган. Олиб борилган махсус тадбир давомида 7 нафар шахснинг кимлиги аён бўлган.
Жиноятга бошчилик қилган шахс бир неча ой аввал шу хонадонда таъмирлаш ишларини олиб борган уста экани аниқланган.
«20—25 кун ишлаганман бу уйда. Шеригим айтиб қолди ‘Сейф кўрдим, ичида пули бор. Бу ишни эплайдиган таниш йигитлар бор’, деди. Мен рози бўлдим».
Жиноятчилар Gentra автомобилини йўлда қолдириб, ўзлари бошқа машинада Тошкент шаҳридан чиқиб кетган. Сейфни бузиб, ичидаги пулни ўзаро бўлишган. Жабрланувчининг маълумотларига кўра, сейф ичида 15 минг доллар бўлган. Ҳозирда зарар миқдорининг бир қисми қопланган.
Босқинчилик қилганларнинг шахси аниқланиб, барчаси терговга келтирилган. Уларга нисбатан Жиноят кодексининг 164-моддаси (босқинчилик) 4-қисми «а» банди ва 267-моддаси (транспорт воситасини олиб қочиш) 2-қисми «б, в» бандлари билан айблов эълон қилиниб, қамоққа олиш тарзидаги эҳтиёт чораси қўлланилган.
Изоҳ (0)