Toshkent hokimi Jahongir Ortiqxo‘jayev xalq deputatlari shahar kengashining 24-dekabr kuni bo‘lib o‘tgan sessiyasida Yangi O‘zbekiston ko‘chasi loyihasini taqdim etdi, deya xabar bermoqda “Gazeta.uz”.
Bunda gap “Yangi O‘zbekiston” bog‘i va qurilayotgan Olimpiya shaharchasiga olib boruvchi ko‘cha haqida bormoqda. Avvallari ushbu obyektlar Qibray tumanida edi, 2021-yil avgustida poytaxt chegaralari o‘zgartirilgach, ular Toshkentning Yashnobod tumani tarkibiga kirdi.
Shahar hokimining so‘zlariga ko‘ra, Yangi O‘zbekiston ko‘chasiga tutash hududlarning zamonaviy me’moriy qiyofasini shakllantirish uchun Vazirlar Mahkamasi huzurida maxsus direksiya tashkil etilgan. Hozirda “ToshboshplanLITI” instituti va Turkiyaning KEYM kompaniyasi tomonidan loyihaning bosh rejasi ishlab chiqilmoqda.
“Mazkur hududda savdo-maishiy va servis majmualari, mehmonxonalar, universitet, sport maydonchalari, maktablar va bolalar bog‘chalari, turar joy obyektlari va biznes markazlari qurilishi rejalashtirilgan”, — deya ma’lum qildi Jahongir Ortiqxo‘jayev.
Qayd etishlaricha, “Yangi O‘zbekiston” bog‘i va Ohangaron—Mahtumquli kesishmasi (sobiq TAPOiCh aylanmasi)dagi uch qavatli ko‘prik orasida joylashgan ko‘cha Yangi O‘zbekiston nomini oladi.
Izoh (0)