Afg‘onistonda “Tolibon” harakati tomonidan tuzilgan Tozalash komissiyasi harakat a’zolari orasidan toliblarning obro‘sini to‘kkan 1895 kishini aniqladi. Bu haqda “Tolibon” matbuot kotibi Inomulla Samanganiy Twitter’dagi sahifasida ma’lum qildi.
Tozalash komissiyasi “Tolibon” tomonidan bir oy oldin tuzilgan. Harakat shu tariqa afg‘onistonliklarning “Tolibon” jangarilarining repressiyalari va o‘zboshimchaliklari haqidagi ko‘plab shikoyat va xabarlariga javob qaytargan.
Ushbu komissiya harakatning marhum asoschisi mulla Umarning o‘g‘li mulla Muhammad Yoqub boshchiligidagi “Tolibon” Mudofaa vazirligiga bo‘ysunadi. Uning asosiy vazifasi safda o‘z harakatlari bilan toliblarni “yomonotliq qilayotgan” shaxslarni aniqlashdan iborat.
Samanganiyning ta’kidlashicha, bir oy davomida aniqlangan “zararkunandalar”ning bir qismi hibsga olinib, ularning ishlari sudga yuborilgan.
Shuningdek, Afghanistan.ru Samanganiyga tayanib, xabar berishicha, “Tolibon” muvaqqat ma’muriyati rahbari o‘rinbosari mavlaviy Abdul Kabir afg‘on sikxlari va induistlari vakillari bilan uchrashuv o‘tkazgan.
U Afg‘onistonni barcha “afg‘onlar uchun umumiy uy” deb atagan va mamlakatning yangi hukumati barcha etnik ozchiliklar xavfsizligini ta’minlashiga kafolat bergan. “Mamlakatdagi barcha etnik guruhlar va fuqarolar xavfsizlikda yashash hamda davlat taraqqiyotiga hissa qo‘shish huquqiga ega”, — degan mavlaviy Abdul Kabir.
O‘z navbatida, sikxlar va induistlar vakillari Afg‘onistonni rivojlantirishda doim ishtirok etib kelganini va bundan keyin ham konstruktiv rol o‘ynashga tayyorligini aytib, ulardan tortib olingan yerlarni qaytarishni so‘ragan.
Bundan avval “Tolibon” Afg‘onistondagi hazoralar jamoasi vakillari bilan ham uchrashib, ularning xavfsizligini ta’minlashga va’da bergandi.
Afg‘onistonda toliblar u yoki bu shaklda hokimiyatga qaytishi ma’lum bo‘lgan so‘nggi ikki yil ichida harakatning safi kengaygan. Joriy yilning avgust oyi o‘rtalarida Kobul bosib olinganida, “Tolibon” jangarilari soni 100 ming kishiga yetgandi.
Afg‘onistonda hokimiyatni qo‘lga kiritganidan so‘ng, yuqori martabali “Tolibon” amaldorlari ag‘darilgan hukumatning sobiq amaldorlari va xavfsizlik kuchlariga qarshi repressiya uyushtirmaslikka ishontirgan edi. Biroq ijtimoiy tarmoqlarda sobiq hukumatga ishlagan yoki Afg‘onistonda 20 yil bo‘lgan xorijiy qo‘shinlar bilan hamkorlik qilgan afg‘onlarning hibsga olingani va o‘ldirilgani haqida muntazam xabarlar paydo bo‘lmoqda. Jurnalistlar va fuqarolik faollariga nisbatan ham repressiyalar amalga oshirilayotgani aytilmoqda.
Odatda, “Tolibon” rasmiylari harakat a’zolarining bunday voqealarga aloqadorligini rad etadi yoki tergov qilishga va’da berib, amalda natija ko‘rsatmaydi. Bundan tashqari, joylarda toliblar o‘z qarindoshlariga uy-joy berish maqsadida, pushtun bo‘lmagan etnik guruhlar vakillarining mol-mulkni tortib olayotgani yoki majburan uyidan chiqarib yuborayotgani haqida xabarlar tarqalgan.
Izoh (0)