Mirzohid Ubaydullayev Iqtisodiy taraqqiyot va kambag‘allikni qisqartirish vazirining o‘rinbosari – Mahallabay ishlash va tadbirkorlikni rivojlantirish agentligi direktori lavozimiga tayinlandi. Bu haqda vazirlik matbuot xizmati xabar berdi.
Eslatib o‘tamiz, Mahallabay ishlash va tadbirkorlikni rivojlantirish agentligi O‘zbekiston prezidentining “Mahallada tadbirkorlikni rivojlantirish, aholi bandligini ta’minlash va kambag‘allikni qisqartirish bo‘yicha davlat siyosatining ustuvor yo‘nalishlari to‘g‘risida”gi qarori bilan tashkil etilgandi.
Ma’lumot uchun, Mirzohid Ubaydullayev 1976-yilda Farg‘ona viloyati Farg‘ona shahrida tug‘ilgan, ma’lumoti oliy. 1999-yilda Farg‘ona politexnika institutini tamomlagan. Shuningdek, Vazirlar Mahkamasi huzuridagi Oliy biznes maktabida tahsil olgan.
O‘z faoliyatini 1999-yilda Farg‘ona shahar Qirguli tuman hokimligi moliya bo‘limi budjet bo‘yicha iqtisodchisi sifatida boshlagan. 2015—2016-yillarda Oliy Majlisi Qonunchilik palatasining Budjet va iqtisodiy islohotlar qo‘mitasi raisining o‘rinbosari, 2016—2020-yillarda Marg‘ilon shahar hokimi lavozimlarida ishlagan.
2020—2021-yillarda Farg‘ona viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari – viloyat iqtisodiy taraqqiyot va kambag‘allikni qisqartirish bosh boshqarmasi boshlig‘i lavozimida faoliyat yuritgan. Tayinlovga qadar u Farg‘ona viloyati Farg‘ona shahri hokimi lavozimida ishlagan.
Avvalroq Buxoroda bir nechta tuman hokimlari o‘zgargani, Namangan elektr tarmoqlari korxonasi direktori Uchqo‘rg‘on tumaniga hokim bo‘lgani, O‘ktam Barnoyevning ukasi Romitan tumani hokimi etib tayinlangani to‘g‘risida xabar berilgandi.
Izoh (0)