25-dekabr kuni prezident Shavkat Mirziyoyev Qashqadaryo viloyati G‘uzor tumanida barpo etilgan Uzbekistan GTL zavodini ishga tushirish marosimida ishtirok etadi. Bu haqda davlat rahbarining matbuot kotibi Sherzod Asadov ma’lum qildi.
Ma’lum qlinishicha, yangi korxona GTL, ya’ni “gazni — suyuqlikka” texnologiyasi asosida yiliga 3,6 milliard metr kub tabiiy gazni qayta ishlab, 1,5 million tonna tayyor mahsulotlar — aviakerosin, dizel yoqilg‘isi, nafta, suyultirilgan gaz ishlab chiqarish quvvatiga ega.
Bunday zavod shu paytgacha jahonda faqat 4 ta davlatda – Qatar, Nigeriya, JAR va Malayziyada barpo etilgan.
Ta’kidlanishicha, davlat rahbarining viloyatga tashrifi chog‘ida, shuningdek, Sho‘rtan gaz-kimyo majmuasining ishlab chiqarish quvvatini kengaytirish loyihasiga ham tamal toshi qo‘yiladi.
Eslatib o‘tamiz, 2020-yilning 21-oktabr kuni Qashqadaryo viloyati G‘uzor tumanida qurilayotgan Uzbekistan GTL zavodida ishchilarning ommaviy tartibsizligi yuz bergan. Qurilish ishlarini amalga oshirayotgan Enter Engineering kompaniyasi tartibsizlik tongda ishchilar uchun mo‘ljallangan oshxonaning monoblok uskunasi (elektron o‘tkazish tizimi)da texnik nosozliklar yuzaga kelgani bois ular o‘z vaqtida nonushtaga kira olmagani sababli yuz berganini ma’lum qildi.
Zavod mas’uli Shuhrat Arziyev OAV vakillari bilan muloqotda Uzbekistan GTL zavodi qurilishidagi ishchilarning ommaviy noroziligiga ularning ish kuni ko‘payib, dam olish kuni o‘zgarishsiz qolgani ham sabab bo‘lganini aytgan. Uzbekistan GTL bosh direktori Faxriddin Abdurasulov to‘polon ko‘targan ishchilar masalasiga to‘xtalib, karantin sabab ularning ish kuni ortib, dam olish kuni o‘zgarishsiz qolgani sabab ishchilarda ruhiy toliqish bo‘lganini ma’lum qilgandi.
Energetika vazirligining holat yuzasidan 21-oktabr kuni bergan bayonotida ta’kidlanishicha, obyektda ish haqini to‘lash bilan bog‘liq muammolar yuzaga kelmagan — to‘lovlar o‘z vaqtida amalga oshirilgan. Bundan tashqari, Enter Engineering kompaniyasi tomonidan ishchilarning qulay turmushi va mehnat faoliyatini olib borishi uchun zarur barcha sharoitlar yaratilgan. Kasaba uyushmalari federatsiyasi esa zavodda yuz bergan tartibsizlik sabablarini o‘rganish maqsadida ishchi guruhi tuzib, 14 ta savoldan iborat anketa orqali uch kun davomida 1500 ga yaqin ishchi bilan muloqot o‘tkazgan.
Keyinroq Uzbekistan GTL zavodini qurayotgan Enter Engineering kompaniyasi Mehnat kodeksining 161-moddasini, ya’ni mehnatga haq to‘lash tartibini qo‘pol ravishda buzgani ma’lum qilingandi.
Izoh (0)