Toshkent shahar Chilonzor tumanida joylashgan bir nechta masjidlarda o‘g‘rilik qilgan shaxs qo‘lga olingani xabar qilingandi. Oliy sud matbuot kotibi unga nisbatan sud hukmi o‘qilganini ma’lum qildi.

Ma’lum qilinishicha, noma’lum shaxs oktabr—noyabr oylarida “Novza”, Qozirobot”, “Ubay ibn Ka’b” masjidlarida fuqarolarning qo‘l telefoni va pullarini o‘g‘irlagan. Jabrlanganlar Ichki ishlar organiga murojaat qilib, yo‘qotganlarini undirib berishni so‘ragan.

“Xufton namozi payti bo‘lgan. Odatdagidek namoz o‘qish uchun jamoat oldiga chiqqanman. Qaytib xonaga kirgan mahalimda stol ustida telefonim yo‘qligi ma’lum bo‘ldi. Masjiddagi kuzatuv kameralari orqali tekshirganimizda bu yigit shu xonaga kirib chiqqani aniqlandi”, — degan  “Ubay ibn Ka’b” masjidi imom noibi.

Kuzatuv kameralari orqali jinoyatchi topilganda u muqaddam uch marta sudlangan xavfli retsidivist (1994-yilda tug‘ilgan) ekani ma’lum bo‘lgan.

U Jinoyat kodeksining 169-moddasi (o‘g‘rilik) 3-qismi “a” bandida ko‘rsatilgan jinoyatda aybli deb topilib, 6 yilga, avval tayinlangan jazoning o‘talmay qolgan qismi qo‘shilib, uzil-kesil 7 yilga ozodlikdan mahrum qilingan. Jazo qattiq tartibli koloniyada o‘talishi belgilangan.