O‘zbekistonning birinchi prezidenti Islom Karimovning qizi Gulnora Karimovaga Shveysariya bankidagi muzlatib qo‘yilgan 70 million dollarlik aktivlari qaytarib berilishi to‘g‘risida xabar berilgandi. O‘zbekiston Adliya vazirligi ushbu holatga munosabat bildirib, ayrim OAVlar sud qarorining ushbu qismini noto‘g‘ri talqin qilgan holda asossiz ma’lumotlar tarqatayotganini ma’lum qildi.
Ta’kidlanishicha, ommaviy axborot vositalarida e’lon qilingan ma’lumotlarda sud qarorining barcha tafsilotlari oshkor etilmagan, bu esa ushbu ish bo‘yicha ishonchli ma’lumotlarni keng jamoatchilikka obyektiv yetkazishga to‘sqinlik qilmoqda.
Eslatib o‘tamiz, 2012-yilda Shveysariya Federal prokuraturasi Gulnora Karimova va unga aloqador shaxslarga nisbatan jinoiy mablag‘larni legallashtirish va qalbakilashtirish bo‘yicha keng ko‘lamli tergov boshlagan edi. Gap O‘zbekiston bozoriga kirish va to‘siqsiz ishlash evaziga xorijiy telekommunikatsiya kompaniyalaridan noqonuniy yo‘l bilan olingan yirik mablag‘larni legallashtirish haqida ketmoqda.
Shveysariya huquqni muhofaza qiluvchi organlari tomonidan olib borilgan jinoiy tergov ishlari doirasida Shveysariya Federal prokuraturasi tomonidan ushbu davlat banklarida joylashgan Takilant Ltd. kompaniyasiga tegishli 350 million dollardan ortiq mablag‘lar musodara qilingan.
2021-yilning 22-dekabrida e’lon qilingan bayonotida Shveysariya sudi Gulnora Karimova va uning sheriklarini noqonuniy mablag‘larni og‘irlashtiruvchi holatlarda legallashtirishda aybdor deb tan olgani va shu sabab 293 million dollaridan ortiq mablag‘ musodara qilingani haqida xabar berdi.
“Bu Shveysariya huquqni muhofaza qiluvchi organlari uchun muhim g‘alaba hisoblanadi, chunki u mablag‘larni O‘zbekistonga qaytarish bo‘yicha keyingi muzokaralar uchun imkoniyat ochadi”, — deyiladi izohda.
Ta’kidlanishicha, sud qaroriga ko‘ra 70 million dollar miqdoridagi mablag‘lar protsessual xarajatlar chiqarib tashlanganidan so‘ng Takilant Ltd. kompaniyasiga qaytarilishi mumkin. Ayrim OAV sud qarorining ushbu qismini noto‘g‘ri talqin qilgan holda asossiz ma’lumotlar tarqatishmoqda.
Bundan tashqari, ushbu mablag‘larga nisbatan AQShning vakolatli organlari tomonidan ularni hibsga olish to‘g‘risida da’vo va order ham mavjud, bu esa Shveysariya sudining ko‘rsatilgan qarori kuchga kirgan taqdirda ham ushbu mablag‘larni kompaniyaga qaytarish imkonini bermaydi.
Ayni paytda O‘zbekistonning davlat organlari Shveysariya va AQSh rasmiylari bilan Gulnora Karimova hamda uning sheriklarining jinoiy faoliyat natijasida orttirilgan aktivlarini qaytarish bo‘yicha faol ish olib bormoqda. Chunki ushbu jinoyatlardan O‘zbekiston davlati va xalqi ham jabr ko‘rgan.
Eslatib o‘tamiz, 2019-yil 18-martda Toshkent shahar sudi hukmi bilan Gulnora Karimovaga 13 yil 4 oy muddatga ozodlikdan mahrum qilish jazosi tayinlangandi. Jazo muddatini 2015-yil 21-avgustdan boshlab hisoblash belgilangan.2019-yil mart oyida AQSh Gulnora Karimova va “O‘zdunrobita”ning sobiq bosh direktori Behzod Ahmedovni korrupsiya va 865 million dollardan ko‘proq pulni “yuvgan”likda ayblagandi. 24-iyunda esa Shveysariya Bosh prokuraturasi Karimova ishi bo‘yicha muzlatilgan 130 million shveysar kronasi (133,7 million dollar) miqdoridagi mablag‘ni O‘zbekistonga qaytarishini ma’lum qilgandi.
2020-yilning may oyiga kelib, Karimovaning 10 million dollarlik aktivi Fransiyadan qaytarilgan. Sentabrga kelib, Shveysariya hukumati musodara qilingan pul mablag‘larini O‘zbekistonga qaytarish shartlari bo‘yicha mamlakat hukumatlari kelishuvga erishganini ma’lum qildi. O‘shanda Karimovaning Shveysariyadagi hisoblaridan olingan 131 million dollarlik mablag‘ O‘zbekistonga qaytarilishi aytilgandi.
Izoh (0)