So‘nggi kunlarda Farg‘ona viloyati hududida bir necha marotaba yer silkinishi kuzatildi. 21-dekabr kuni viloyatning Rishton tumanida, 23-dekabr kuni esa shu tumanda 2 marta zilzila kuzatildi. FVV Seysmoprognostik monitoring Respublika markazi mazkur holat yuzasidan “Darakchi.uz” izoh berdi.
Qayd etilishicha, O‘zbekiston hududining 70 foiz qismi seysmik faol hudud hisoblanadi. “Jumladan Farg‘ona vodiysi, Toshkent shahri va Toshkent viloyatlari Respublikaning boshqa hududlariga nisbatan anchayin seysmik faol hududlardir”, — deyiladi markaz izohida.
Ta’kidlanishicha, yil davomida Respublika hududi bo‘yicha o‘rtacha hisobda 1200 dan oshiq kuchsiz va sezilarli zilzilalar qayd etiladi. Ushbu zilzilalarning aksar qismi kuchsiz zilzilalar bo‘lib, faqatgina maxsus asbob-uskunalar yordamida aniqlanadi.
“Birgina Farg‘ona vodiysi hududida hafta davomida o‘rtacha 20-25 ta kuchsiz va sezilarli zilzilalar qayd etiladi. Bu tabiiy jarayon hisoblanadi. Bundan tashqari Respublika bilan chegaradosh Qirg‘iziston, Tojikiston va Afg‘oniston hududlari anchayin seysmik faol hududlar toifasiga kirganligi sababli, mazkur davlatlarda sodir bo‘lgan sezilarli zilzilalar bizning qo‘shni hududlarimizda ham seziladi. Umuman olganda Markaziy Osiyo mintaqasining ko‘p qismi seysmik faol hudud hisoblanadi”, — deyiladi xabarda.
Alohida qayd etilishicha, shu kunlarda Farg‘ona viloyati Rishton tumanida ketma-ket sodir bo‘layotgan zilzilalar kuchsiz zilzilalar hisoblanib, odamlar uni deyarli sezmaydi.
Ma’lumot uchun, 24-dekabr kuni O‘zbekiston—Qirg‘iziston chegarasida ham zilzila qayd etildi. Zilzila episentri Toshkentdan 191 kilometr janubiy-sharqda joylashgan bo‘lib, o‘chog‘i 15 kilometr chuqurlikda, magnitudasi 3 ballga teng bo‘lgan.
Izoh (0)