O‘zbekistonda asosiy oziq-ovqat mahsulotlari importi va realizatsiyasi uchun qo‘shimcha qiymat solig‘idan (QQS) berilgan imtiyozlar muddati uzaytiriladi. Bu haqda Oliy Majlis Qonunchilik palatasi deputati Doniyor G‘aniyev ma’lum qildi.
Eslatib o‘tamiz, 2021-yilda parlament tomonidan 2021-yil 1-maydan 31-dekabrgacha bo‘lgan muddatda kungaboqar va soya urug‘lari hamda o‘simlik yog‘i importi, shuningdek o‘simlik yog‘ini ishlab chiqarish va ichki bozorda realizatsiya qilish QQSdan ozod etilgandi.
Bundan tashqari, ikki oy avval Soliq kodeksiga kiritilgan o‘zgartirishlarga asosan 2021-yil 10-oktabrdan 2021-yil oxirigacha go‘sht (mol, qo‘y, tovuq), tirik hayvonlar (qoramol va parranda) va ularni so‘yishdan olingan mahsulotlarni, kartoshka hamda muzlatilgan baliqni realizatsiya qilish bo‘yicha aylanma, shuningdek, ularni O‘zbekiston hududiga olib kirish ham QQSdan ozod qilingandi.
Deputatning yozishicha, yaqinda bo‘lib o‘tgan Budjet loyihasi muhokamasi doirasida u 2022-yilda inflatsiya darajasini 2021-yilga nisbatan pasaytirish, aholini xarid qobiliyatini oshirish va eng asosiysi iste’mol tarkibidagi asosiy oziq-ovqat mahsulotlari narxlarini barqaror saqlash maqsadida hukumat vakillari, jumladan, bosh vazir o‘rinbosari Jamshid Qo‘chqorovdan oziq-ovqat mahsulotlari uchun 2021-yil oxirigacha berilgan QQS imtiyozlari muddatini uzaytirish masalasini ko‘rib chiqishni so‘ragan.
Ta’kidlanishicha, 23-dekabr kuni parlamentga hukumat tomonidan kiritilgan qonun loyihasida aynan shu taklif inobatga olinib, 2021-yil oxirigicha berilgan imtiyozlar muddati yana 4 oy muddatga cho‘zilishi nazarda tutilmoda.
Demak, ushbu qonun loyihasiga asosan 2022-yil 30-aprelga qadar quyidagilar QQSdan ozod qilinadi:
- O‘zbekiston hududiga o‘simlik yog‘i, kungaboqar va zig‘ir urug‘i, shuningdek, soya danagini olib kirish;
- o‘simlik yog‘ini (paxta yog‘idan tashqari) ishlab chiqarish va (yoki) realizatsiya qilish bo‘yicha aylanma;
- go‘sht (mol, qo‘y, tovuq), tirik hayvonlar (qoramol va parranda) va ularni so‘yishdan olingan mahsulotlarni, kartoshkani hamda muzlatilgan baliqni realizatsiya qilish bo‘yicha aylanma, shuningdek ularni mamlakat hududiga olib kirish.
Qolaversa, go‘sht, yog‘ va kartoshka mahsulotlari aholi iste’mol savatchasi tarkibida yuqori vaznga ega ekanligi inobatga olinsa, ushbu mahsulotlar narxlarini barqaror saqlanishi o‘z navbatida boshqa iste’mol tovar va xizmatlar narxlari o‘sish sur’atlarini pasaytirishga ijobiy ta’sir qiladi. Umid qilamanki, mazkur qonun loyihasi kelgusi parlament yalpi yig‘ilishida deputatlar tomonidan ko‘rib chiqilib, ma’qullanadi hamda Senatga yuboriladi”, — deb yozadi Doniyor G‘aniyev.
Izoh (0)