Swissinfo axborot agentligi Gulnora Karimovaning advokati Gregori Manjaga tayanib xabar berishicha, Shveysariyaning federal jinoyat sudi kompaniyaga tegishli 293 million dollardan ko‘proq mablag‘ni musodara qilish to‘g‘risida qaror qabul qilgan.
Ta’kidlanishicha, sud ishida qatnashgan bir necha kishi, shu jumladan, Gulnora Karimova va uning yordamchisi “pul yuvishda” aybdor deb topilgani uchun ushbu mablag‘larning katta qismini musodara qilish kerak degan qarorga kelgan.
Biroq taxminan 70 million dollar miqdoridagi mablag‘ Takilant kompaniyasiga qaytarib beriladi. Buning sababi, tergov jarayonida bir nechta kompaniyalar bilan bog‘liq bo‘lgan ushbu aktivlar jinoyat natijasida olingani aniqlanmagan. Bu haqda 2021-yilning 22-dekabr kuni Federal jinoyat sudi e’lon qilgan bayonotda qayd etilgan.
Sud qarori Shveysariya Federal prokuraturasi tomonidan 2012-yilda Gulnora Karimovaning shaxsiy yordamchisi va Rossiya telekommunikatsiya kompaniyasining o‘zbek filiali menejeriga qarshi “pul yuvish” ayblovlari bilan bog‘liq keng qamrovli tergov doirasida yana bir bobni yopgan.
Eslatib o‘tamiz, 2018-yilda Takilant Ltd. kompaniyasiga tegishli 350 million dollar muzlatilgan edi. 2020-yilga kelib, Shveysariyaning federal apellyatsiya sudi Gulnora Karimovaning kompaniyasi qonuniy benefitsiari ekani to‘g‘risidagi da’vosini ko‘rib chiqishi ma’lum qilindi. O‘shandan boshlab Karimovaning vakillari ushbu muzlatilgan aktivlarni qaytarib olishga harakat qilayotgandi. “Bu Gulnora Karimova uchun muhim g‘alaba”, — degandi uning advokati Gregori Manja.
2019-yil 18-martda Toshkent shahar sudi hukmi bilan Gulnora Karimovaga 13 yil 4 oy muddatga ozodlikdan mahrum qilish jazosi tayinlandi. Jazo muddatini 2015-yil 21-avgustdan boshlab hisoblash belgilangan edi.
2019-yil mart oyida AQSh Gulnora Karimova va “O‘zdunrobita”ning sobiq bosh direktori Behzod Ahmedovni korrupsiya va 865 million dollardan ko‘proq pulni “yuvgan”likda ayblagandi. 24-iyunda esa Shveysariya Bosh prokuraturasi Karimova ishi bo‘yicha muzlatilgan 130 million shveysar kronasi (133,7 million dollar) miqdoridagi mablag‘ni O‘zbekistonga qaytarishini ma’lum qilgandi.
2020-yilning may oyiga kelib, Karimovaning 10 million dollarlik aktivi Fransiyadan qaytarilgan. Sentabrga kelib, Shveysariya hukumati musodara qilingan pul mablag‘larini O‘zbekistonga qaytarish shartlari bo‘yicha mamlakat hukumatlari kelishuvga erishganini ma’lum qildi. O‘shanda Karimovaning Shveysariyadagi hisoblaridan olingan 131 million dollarlik mablag‘ O‘zbekistonga qaytarilishi aytilgandi.
Izoh (0)