O‘zbekiston ombudsmani Gulnora Karimovaning ahvolini ma’lum qildi

Oliy Majlisning Inson huquqlari bo‘yicha vakili (ombudsmani) Feruza Eshmatova 8-oktabr kuni jurnalistlar bilan uchrashuvda O‘zbekiston Birinchi Prezidentining ayni vaqtda jazo muddatini o‘tayotgan to‘ng‘ich qizi Gulnora Karimovaning ahvoli haqidagi savolga javob berdi.

Uning so‘zlariga ko‘ra, mamlakatda 200 dan ortiq jazoni ijro etish muassasalari bo‘lib, ombudsman ularga reja asosida birma-bir tashrif buyuradi. “Men shaxsan o‘zim bir necha bor ayollar koloniyasi (Zangiotadagi 21-sonli umumiy tartibdagi ayollar koloniyasi)da, jumladan, monitoring tashrifi bilan bo‘lganman. U (Gulnora Karimova) bilan suhbat bo‘lgan”, — dedi u.

“Gazeta.uz”ning eslatishicha, 2021-yilning iyul oyida Gulnora Karimovaning qizi Imon u va advokatlari onasi bilan uchrasha olmayotganini ma’lum qilgandi. “Men u bilan uchrashishga urinib ko‘rish uchun O‘zbekistonga qaytdim, ammo rasmiylar uni tashqi dunyo bilan aloqasiz ushlab turish uchun har turli bahonalar o‘ylab topishda davom etmoqda; hatto advokatlar bilan uchrashish, telefon qo‘ng‘iroqlari, xatlar va hokazolarga ham taqiq qo‘yilgan”, — deb yozgandi u Instagram’dagi sahifasida.

Feruza Eshmatovaning taxminicha, tomonlar koronavirus pandemiyasi tufayli joriy etilgan karantin cheklovlari sabab uchrasha olmagan bo‘lishi mumkin. “Hozirda bizga ulardan bunday (uchrashuv haqida) murojaat kelib tushmagan”, — dedi u.

Ombudsmanning qayd etishicha, koronavirusga qarshi kurash bo‘yicha Respublika maxsus komissiyasi “cheklovlarni biroz yumshatgani” bois hozirgi vaqtda koloniyalarda qisqa muddatli uchrashuvlar amaliyoti qayta tiklangan.

Gulnora Karimovaning advokati Fanni Margayraz Le Temps gazetasiga bergan intervyusida u 2019-yil iyunidan beri birinchi marta 2021-yilning 7 va 8-sentabr kunlari mijozi bilan qamoqxonada uchrashishga muvaffaq bo‘lganini ma’lum qilgan edi. “Bu safar biz u bilan faqat o‘zbekistonlik advokat va tarjimon guvohligida uchrasha oldik. Uning qo‘llarida bir necha ko‘karishlar bor edi”, — deb ta’kidlagan edi u.

Feruza Eshmatovaning ma’lum qilishicha, Gulnora Karimova saqlanayotgan koloniyada takroriy monitoring o‘tkaziladi.

“Biz yana monitoring o‘tkazamiz, chunki biz u yerda bo‘lgandik. Men u bilan uchrashgandim. U bilan uchrashgan vaqtim hammasi joyida edi. Biz yana monitoring o‘tkazamiz, chunki bitta monitoringdan so‘ng biz takroran tekshiramiz”, — dedi ombudsman.

Hozir Gulnora Karimova bilan hammasi joyidami, qabilida berilgan savolga Oliy Majlisning Inson huquqlari bo‘yicha vakili qisqacha: “Ha”, deb javob berdi.

Gulnora Karimova 2019-yil bahoridan beri 21-sonli koloniyada jazo o‘tamoqda. 2020-yil mart oyida Oliy sud matbuot xizmati Karimova xonimning 13 yil 4 oy muddatga ozodlikdan mahrum etilganini ma’lum qilgan edi.

2020-yil may oyida Karimovaning 10 million dollarlik aktivlari Fransiyadan O‘zbekistonga qaytarilgan edi. O‘shanda O‘zbekiston Adliya vazirligi Gulnora Karimovaga tegishli va mamlakatga qaytarilayotgan mablag‘larning qanday xarajat qilinayotgani jamoatchilikka muntazam axborot taqdim etishga va’da bergandi.

2020-yil sentabrida O‘zbekiston va Shveysariya Gulnora Karimovaning Shveysariyadagi hisob-raqamlaridan olingan qiymati 131 million dollarga yaqin bo‘lgan aktivlar O‘zbekistonga qaytarilishi borasida hadli kelishuvga erishgani ma’lum bo‘lgan edi.