Belarus prezidenti Aleksandr Lukashenko bir-ikki kundan keyin yangi konstitutsiya loyihasi umumxalq muhokamasiga taqdim etilishini aytdi. Bu haqda “BelTA” xabar berdi.
“Bir-ikki kun xatolarni tuzatib, vergullarni qo‘yib, konstitutsiya loyihasini muhokamaga kiritamiz”, — dedi Lukashenko 23-dekabr kuni konstitutsiyaga o‘zgartirishlar kiritish bo‘yicha komissiya va ishchi guruh a’zolari bilan o‘tkazilgan yakuniy yig‘ilishda.
Lukashenkoning aytishicha, konstitutsiya o‘zgartiriladigan bo‘lsa, mamlakatdagi boshqaruv tizimi qayta quriladi. “Konstitutsiyani qabul qilib, xalq uni qo‘llab-quvvatlasa, biz — amaldagi hokimiyat organlari, jumladan, prezident, parlament va boshqalar mamlakatdagi tizimni ushbu konstitutsiyaga muvofiq qayta qurishimiz kerak bo‘ladi”, — dedi Lukashenko. “Agar kimdir biz hammasini nomigagina qabul qilib, bir chetga tashlab qo‘yamiz, chalkashlik va tartibsizliklar boshlanadi, deb o‘ylasa, yanglishadi”.
U e’lon qilingan loyiha yakuniy bo‘lmasligini aytdi. “Loyiha bo‘yicha xalqning takliflarini muhokama qilganimizdan keyin u yakuniy bo‘ladi”, — dedi Belarus rahbari. Vaqt borasida uning aniqlik kiritishicha, yanvar oyining oxiri – fevral oyi boshida “xalq muhokamasidan so‘ng konstitutsiyaning yakuniy loyihasini shakllantirishga yana bir qaytish, taxminan fevral oyining ikkinchi yarmida esa uni referendumga kiritish kerak.”
“Shunisi qulay: odamlarni chalg‘itmaymiz, qishda, katta va kichik shaharlarda, ayniqsa qishloqlarda ish kamroq bo‘ladi”, — dedi u. Lukashenkoning aytishicha, fevral oyining ikkinchi yarmida konstitutsiyaga o‘zgartirishlar kiritish bo‘yicha referendum o‘tkaziladi.
“Referendum fevral oyining ikkinchi yarmida bo‘lib o‘tadi”, — dedi u. Belarus rahbarining so‘zlariga ko‘ra, umumxalq muhokamasidan so‘ng ishchi guruh yana bir bor yig‘ilib, konstitutsiya loyihasiga “xalq tomonidan qanday muhim, fundamental takliflar bildirilganini ko‘rib chiqadi”. Keyin Konstitutsiyaviy komissiyaning yakuniy majlisi bo‘lib o‘tadi. “Va tayyor holga kelgan loyiha bilan Konstitutsiyaviy komissiya ishchi guruhimiz ishining natijalarini ko‘rib chiqib, ma’qullagach konstitutsiya loyihasini referendumga kiritamiz”, — dedi prezident.
Belarusda 2020-yil 9-avgustda bo‘lib o‘tgan prezidentlik saylovlaridan keyin boshlangan norozilik namoyishlari fonida Lukashenko konstitutsiyaga o‘zgartirish kiritish zarurati va prezidentlik vakolatlarining bir qismini hokimiyatning boshqa tarmoqlari foydasiga qayta taqsimlashga tayyorligini ma’lum qilgan. Taklif etilayotgan o‘zgartirishlarning mazmun-mohiyati prezidentlik boshqaruv shaklini saqlab qolish, davlat rahbari, parlament va hukumatning funksiya va vakolatlarini aniqlashtirishdan iborat, xususan, hukumatning vakolatlarini va uning ijro hokimiyati sohasida qarorlar qabul qilishdagi mustaqilligini kengaytirish taklif etilmoqda. Dastlab demokratiyaning alohida shakli sifatida tashkil etilgan Butun Belarus xalq yig‘ilishini konstitutsiyaviy organga aylantirish va unga qo‘shimcha funksiyalar berish ham ko‘zda tutilgan. Avvalroq, asosiy qonunning yangi tahriri bo‘yicha referendum 2022-yil fevral oyida bo‘lib o‘tishi xabar qilingandi.
Izoh (0)