AQShda sud hay’ati a’zolari amerikalik taniqli olim Charlz Liberni Xitoy bilan ilmiy hamkorlikni va undan keladigan daromadlarni yashirishda aybdor deb topdi. Bu haqda CBS telekanaliga tayanib, “RIA Novosti” xabar berdi.
Boston federal sudi hay’ati Garvard universitetining kimyo va biologiya fakulteti sobiq dekani noto‘g‘ri soliq deklaratsiyalarini taqdim etib, Xitoy banklarida hisob raqami borligini aytmasdan, hukumatni aldab kelgani borasidagi ma’lumotlar tasdiqlangan deb hisoblagan.
Tegov ma’lumotlariga ko‘ra, nanomateriallar sohasida dunyodagi yetakchi mutaxassislardan biri hisoblanuvchi 62 yoshli Liber asosiy ish beruvchisini ogohlantirmagan holda Xitoyning “Ming iste’dod” ilmiy kadrlar dasturiga qo‘shilgan va Uxan texnologiya universitetida lavozimga ega bo‘lgan. Unga har oy 50 ming dollar maoshdan tashqari, 150 ming dollar miqdoridagi xarajatlari to‘langan va tadqiqot laboratoriyasini jihozlash uchun 1,5 million dollardan ajratilgan.
Olimning o‘zi asosiy motivatsiya pul emas, balki dunyoga tanilish va Nobel mukofotini qo‘lga kiritish istagi bo‘lganini ta’kidlagan.
Wall Street Journal’ning yozishicha, AQSh hukumati Xitoy bilan aloqada bo‘lgan yana 24 nafar ilmiy xodimga ayblov e’lon qilgan. Ularning to‘qqiz nafari aybini tan olgan, oltitasidan ayblov olib tashlangan.
Avvalroq Latviya parlamenti deputati Rossiya foydasiga josuslik faoliyati bilan shug‘ullanganlikda gumon qilinayotgani, Bolgariyada ikki nafar rossiyalik diplomat josuslikda gumon qilinib, Rossiyaga qaytarib yuborilgani to‘g‘risida xabar berilgandi.
Izoh (0)