Rossiyaning “Novaya gazeta” nashri bosh muharriri Dmitriy Muratov va’da qilganidek, o‘ziga berilgan tinchlik bo‘yicha Nobel mukofoti mablag‘larini xayriyaga topshirdi, deb xabar beradi Meduza.
“Mukofotni olish uni sarflashdan ko‘ra tezroq bo‘ldi. Ammo biz buni ‘VTB’ banki aniq ishlagan menejmenti sabab amalga oshirdik, shu sababli uning xodimlariga minnatdorchilik bildiraman”, — deydi Muratov.
Mukofotning umumiy summasi qariyb 40,2 million rublni (546 ming dollar) tashkil etgan. Pul tashkilotlar o‘rtasida taqsimlangan bo‘lib, ular “sheriklar” – “Novaya gazeta”ni xayriya bilan qo‘llab-quvvatlagan o‘quvchilar orasidan ovoz berish yo‘li bilan tanlangan.
Natijada besh million rubldan “Mayoqli uy” xospisi (palliativ yordam ko‘rsatiluvchi maxsus kasalxona), “Hayot sovg‘a qil”, “Mehr doirasi” va “Umid” jamg‘armalari hisobiga o‘tkazilgan. Shuningdek, yana 10 million rubl turli nashr xodimlarining og‘ir kasalliklariga qarshi kurashishda yordam beradigan OAV xodimlarining tibbiyot jamg‘armasiga o‘tkazilgan.
Bundan tashqari, mablag‘larning bir qismi Rossiyada matbuotning ahvolini tasvirlovchi filmni yaratishga va “Novaya gazeta”ning ayrim xodimlarini rag‘batlantirishga yo‘naltirilgan. “Ozginasi jamg‘arma sifatida qoldi (‘Novaya gazeta’ uchun) — har ehtimolga qarshi”, — deya qo‘shimcha qilgan Muratov.
Eslatib o‘tamiz, 8-oktabr kuni tinchlik bo‘yicha Nobel mukofotiga Rossiyaning “Novaya gazeta” nashri bosh muharriri Dmitriy Muratov va filippinlik jurnalist, Rapple muxolifatchi sayti rahbari Mariya Ressa sazovor bo‘ldi. Nobel mukofoti ularga “demokratiya hamda barqaror tinchlik o‘rnatilishining dastlabki sharti bo‘lgan fikr bildirish erkinligini himoya qilish bo‘yicha intilishlari” uchun berilgan.
Izoh (0)