Беларусь президенти Александр Лукашенко бир-икки кундан кейин янги конституция лойиҳаси умумхалқ муҳокамасига тақдим этилишини айтди. Бу ҳақда «БелТА» хабар берди.
«Бир-икки кун хатоларни тузатиб, вергулларни қўйиб, конституция лойиҳасини муҳокамага киритамиз», — деди Лукашенко 23 декабрь куни конституцияга ўзгартиришлар киритиш бўйича комиссия ва ишчи гуруҳ аъзолари билан ўтказилган якуний йиғилишда.
Лукашенконинг айтишича, конституция ўзгартириладиган бўлса, мамлакатдаги бошқарув тизими қайта қурилади. «Конституцияни қабул қилиб, халқ уни қўллаб-қувватласа, биз — амалдаги ҳокимият органлари, жумладан, президент, парламент ва бошқалар мамлакатдаги тизимни ушбу конституцияга мувофиқ қайта қуришимиз керак бўлади», — деди Лукашенко. «Агар кимдир биз ҳаммасини номигагина қабул қилиб, бир четга ташлаб қўямиз, чалкашлик ва тартибсизликлар бошланади, деб ўйласа, янглишади».
У эълон қилинган лойиҳа якуний бўлмаслигини айтди. «Лойиҳа бўйича халқнинг таклифларини муҳокама қилганимиздан кейин у якуний бўлади», — деди Беларусь раҳбари. Вақт борасида унинг аниқлик киритишича, январь ойининг охири – февраль ойи бошида «халқ муҳокамасидан сўнг конституциянинг якуний лойиҳасини шакллантиришга яна бир қайтиш, тахминан февраль ойининг иккинчи ярмида эса уни референдумга киритиш керак.»
«Шуниси қулай: одамларни чалғитмаймиз, қишда, катта ва кичик шаҳарларда, айниқса қишлоқларда иш камроқ бўлади», — деди у. Лукашенконинг айтишича, февраль ойининг иккинчи ярмида конституцияга ўзгартиришлар киритиш бўйича референдум ўтказилади.
«Референдум февраль ойининг иккинчи ярмида бўлиб ўтади», — деди у. Беларусь раҳбарининг сўзларига кўра, умумхалқ муҳокамасидан сўнг ишчи гуруҳ яна бир бор йиғилиб, конституция лойиҳасига «халқ томонидан қандай муҳим, фундаментал таклифлар билдирилганини кўриб чиқади». Кейин Конституциявий комиссиянинг якуний мажлиси бўлиб ўтади. «Ва тайёр ҳолга келган лойиҳа билан Конституциявий комиссия ишчи гуруҳимиз ишининг натижаларини кўриб чиқиб, маъқуллагач конституция лойиҳасини референдумга киритамиз», — деди президент.
Беларусда 2020 йил 9 августда бўлиб ўтган президентлик сайловларидан кейин бошланган норозилик намойишлари фонида Лукашенко конституцияга ўзгартириш киритиш зарурати ва президентлик ваколатларининг бир қисмини ҳокимиятнинг бошқа тармоқлари фойдасига қайта тақсимлашга тайёрлигини маълум қилган. Таклиф этилаётган ўзгартиришларнинг мазмун-моҳияти президентлик бошқарув шаклини сақлаб қолиш, давлат раҳбари, парламент ва ҳукуматнинг функция ва ваколатларини аниқлаштиришдан иборат, хусусан, ҳукуматнинг ваколатларини ва унинг ижро ҳокимияти соҳасида қарорлар қабул қилишдаги мустақиллигини кенгайтириш таклиф этилмоқда. Дастлаб демократиянинг алоҳида шакли сифатида ташкил этилган Бутун Беларусь халқ йиғилишини конституциявий органга айлантириш ва унга қўшимча функциялар бериш ҳам кўзда тутилган. Аввалроқ, асосий қонуннинг янги таҳрири бўйича референдум 2022 йил февраль ойида бўлиб ўтиши хабар қилинганди.
Изоҳ (0)