Rossiya va Belarus yadroviy qurollarni joylashtirishga oid tahdidlar bilan “o‘yin qilmasligi” kerak. Bu haqda Ukraina prezidenti Vladimir Zelenskiy Polsha va Litva prezidentlari bilan qo‘shma brifingda aytib o‘tdi. Shu tariqa u Minskning Belarus NATO tahdidi ostida yadro bilan qurollanishga tayyorligi to‘g‘risidagi bayonotiga fikr bildirdi.
“Fikrimcha, har qanday tahdidlar bilan, deylik u Rossiya yadroviy qurollarining dunyoning turli burchaklarida kezib yurishi bilan bog‘liq bo‘ladimi, vaqtincha ishg‘ol qilingan Qrim hududiga yadro quroli joylashtirilgani haqida ko‘p marta eshitganlarimiz bo‘ladimi, yoki hozir bu borada Belarus haqida eshitayotgan ma’lumotlarimizmi, bunday narsalar bilan o‘yin qilib bo‘lmaydi”, — deya ta’kidladi Ukraina prezidenti.
Uning qo‘shimcha qilishicha, Rossiyadan va Belarusning ayrim vakillaridan uyushtiriladigan “axborot hujumlari” — Kiyev uchun tanish holat. “Bu sodir bo‘lgan taqdirda ham hech yo‘qsa, Rossiya yadroviy qurollarining bir qismi aynan qayerga joylashtirilishini bilib olamiz”, — dedi Zelenskiy.
18-dekabr kuni Belarus tashqi ishlar vazirligi rahbari Vladimir Makey NATO tahdidi yuz beradigan bo‘lsa Belarus o‘z hududiga yadro qurolini joylashtirishga tayyorligini ma’lum qilgandi. Uning tushuntirishicha, bu alyansning Polsha hududidagi ehtimoliy harakatlariga nisbatan Minsk ko‘rib chiqayotgan javoblardan biridir. Noyabr oyida Belarus prezidenti Aleksandr Lukashenko, agar Polshaga yadroviy qurollar joylashtirilsa, Minsk ham o‘z hududiga Rossiyaning shunday qurollarini joylashtirish taklifi bilan chiqishini aytgandi.
Rossiya prezidenti matbuot kotibi Dmitriy Peskov Makeyning so‘zlariga fikr bildirar ekan, agar NATO o‘z chegaralarida qurol joylashtirsa, Rossiya tegishli choralar ko‘rishini ma’lum qildi.
Polsha va Litva yetakchilari bilan bo‘lib o‘tgan brifingda Zelenskiy, shuningdek, agar Belarusda yadro quroli joylashtirilsa, Kiyev Minskka qarshi “o‘ta og‘ir sanksiyalar” kiritishini aytdi. Shu bilan birga, u Rossiya bilan bog‘liq vaziyatda bo‘lar ish bo‘lgandan so‘ng emas, balki oldindan harakat qilish zarurligini ta’kidladi.
“Ochig‘ini aytsam, Rossiya prezidentining ortga qadam tashlashi uchun hech qanday sabab ko‘rmayapman. Shuning uchun, aksincha, oldini olish choralarini ko‘rish, jiddiy sanksiyalar bo‘lishi kerak, deb o‘ylayman, toki biror mintaqa keskinlikni oshirish haqida xayol ham qilmasin”, — dedi Zelenskiy.
Dekabr oyi boshida Polsha, Litva va Ukraina prezidentlari qo‘shma bayonot berib, Rossiyaga qarshi sanksiyalarni kuchaytirishga chaqirgan edi. Ular Rossiya tomonidan “Ukrainaga qarshi tajovuz davom etayotganini” ma’lum qilgan, shuningdek, “Shimoliy oqim 2” quvuridan xavotir bildirgan.
Izoh (0)