Россия ва Беларусь ядровий қуролларни жойлаштиришга оид таҳдидлар билан «ўйин қилмаслиги» керак. Бу ҳақда Украина президенти Владимир Зеленский Польша ва Литва президентлари билан қўшма брифингда айтиб ўтди. Шу тариқа у Минскнинг Беларусь НАТО таҳдиди остида ядро билан қуролланишга тайёрлиги тўғрисидаги баёнотига фикр билдирди.
«Фикримча, ҳар қандай таҳдидлар билан, дейлик у Россия ядровий қуролларининг дунёнинг турли бурчакларида кезиб юриши билан боғлиқ бўладими, вақтинча ишғол қилинган Қрим ҳудудига ядро қуроли жойлаштирилгани ҳақида кўп марта эшитганларимиз бўладими, ёки ҳозир бу борада Беларусь ҳақида эшитаётган маълумотларимизми, бундай нарсалар билан ўйин қилиб бўлмайди», — дея таъкидлади Украина президенти.
Унинг қўшимча қилишича, Россиядан ва Беларуснинг айрим вакилларидан уюштириладиган «ахборот ҳужумлари» — Киев учун таниш ҳолат. «Бу содир бўлган тақдирда ҳам ҳеч йўқса, Россия ядровий қуролларининг бир қисми айнан қаерга жойлаштирилишини билиб оламиз», — деди Зеленский.
18 декабрь куни Беларусь ташқи ишлар вазирлиги раҳбари Владимир Макей НАТО таҳдиди юз берадиган бўлса Беларусь ўз ҳудудига ядро қуролини жойлаштиришга тайёрлигини маълум қилганди. Унинг тушунтиришича, бу альянснинг Польша ҳудудидаги эҳтимолий ҳаракатларига нисбатан Минск кўриб чиқаётган жавоблардан биридир. Ноябрь ойида Беларусь президенти Александр Лукашенко, агар Польшага ядровий қуроллар жойлаштирилса, Минск ҳам ўз ҳудудига Россиянинг шундай қуролларини жойлаштириш таклифи билан чиқишини айтганди.
Россия президенти матбуот котиби Дмитрий Песков Макейнинг сўзларига фикр билдирар экан, агар НАТО ўз чегараларида қурол жойлаштирса, Россия тегишли чоралар кўришини маълум қилди.
Польша ва Литва етакчилари билан бўлиб ўтган брифингда Зеленский, шунингдек, агар Беларусда ядро қуроли жойлаштирилса, Киев Минскка қарши «ўта оғир санкциялар» киритишини айтди. Шу билан бирга, у Россия билан боғлиқ вазиятда бўлар иш бўлгандан сўнг эмас, балки олдиндан ҳаракат қилиш зарурлигини таъкидлади.
«Очиғини айтсам, Россия президентининг ортга қадам ташлаши учун ҳеч қандай сабаб кўрмаяпман. Шунинг учун, аксинча, олдини олиш чораларини кўриш, жиддий санкциялар бўлиши керак, деб ўйлайман, токи бирор минтақа кескинликни ошириш ҳақида хаёл ҳам қилмасин», — деди Зеленский.
Декабрь ойи бошида Польша, Литва ва Украина президентлари қўшма баёнот бериб, Россияга қарши санкцияларни кучайтиришга чақирган эди. Улар Россия томонидан «Украинага қарши тажовуз давом этаётганини» маълум қилган, шунингдек, «Шимолий оқим 2» қувуридан хавотир билдирган.
Изоҳ (0)