2-dekabr kuni prezident Shavkat Mirziyoyev raisligida ipoteka va qurilish materiallari mavzusidagi videoselektor yig‘ilishi o‘tkazilgani to‘g‘risida xabar berilgandi. Unda davlat rahbari viloyat hokimlari va ularning qurilish bo‘yicha o‘rinbosarlari uy-joy qurilishi uchun pudratchi tanlashda 2-3 ta tashkilot bilan cheklanayotgani, sababi hammasi ularning odami ekanini tanqid qilgan. Bu haqda “O‘zbekiston 24” telekanali orqali efirga uzatilgan lavhada so‘z boradi.

Foto: Prezident matbuot xizmati

“Nimaga deganda, hammasi o‘zingning odaming. Qani qonun ustuvorligi, jazo muqarrarligi? Shu bois 2022-yildan boshlab davlat hisobidan amalga oshiriladigan qurilishlarda korrupsiyaga qarshi kurashish bo‘yicha yangi tizim yaratiladi. Respublika va viloyat shtablari tuziladi. Ular qurilish narxlari asossiz oshirish, raqobatni buzish, tasdiqlangan loyihalarni o‘zboshimchalik bilan o‘zgartirish va tanish-bilishchilikka yo‘l qo‘ymaslik ustidan qattiq nazorat o‘rnatadi”, — deydi prezident.

Bundan avval O‘zbekistonning har bir hududida uy-joy qurilish klasterlari tashkil etilishi, Shavkat Mirziyoyev budjetdan maqsadli kreditlar uchun ajratilgan qancha mablag‘ o‘zlashtirilmasdan turganini aytgani haqida xabar berilgandi.