Ichki ishlar vazirligi “Ta’lim muassasalarida yo‘l harakati qoidalari targ‘ibotini kuchaytirish chora-tadbirlari to‘g‘risida”gi Vazirlar Mahkamasi qarori loyihasini muhokamaga qo‘ydi.
Qaror bilan IIV DYHXXning amaldagi shtat birliklari doirasida Yo‘l harakati xavfsizligi bosh boshqarmasi va hududiy boshqarmalarida 1 nafardan oliy pedagogik ma’lumotga ega, ta’lim muassasalari bilan hamkorlikda xizmat olib boruvchi alohida katta inspektor lavozimini joriy etish to‘g‘risidagi taklifiga rozilik berilishi mumkin.
Ta’lim muassasalarida xizmat qiluvchi katta inspektor:
- ta’lim muassasalarida yoshlar o‘rtasida targ‘ibot-tashviqot ishlarini olib boradi, viktorina va musobaqalarni tashkil etadi, tadbirlarning ommaviy axborot vositalarida yoritilishini ta’minlaydi, maktablarda yo‘l harakati qoidalarini o‘rgatish bo‘yicha yaratilgan sharoitlarni o‘rganadi, monitoring qiladi va baholaydi, aniqlangan kamchiliklar yuzasidan yuqori turuvchi tashkilotlarga taqdimnomalar, axborotnomalar kiritadi;
- ta’lim muassasalarida mazkur qaror doirasida amalga oshirilayotgan ishlarni nazorat qiladi;
- har haftada Ichki ishlar vazirligi Yo‘l harakati havfsizligi bosh boshqarmasiga amalga oshirilgan ishlar yuzasidan hisobot beradi.
Shuningdek, Transport vazirligiga Ichki ishlar vazirligi va mahalliy ijro etuvchi organlar bilan birgalikda 2021–2023-yillarda bosqichma-bosqich barcha maktabgacha ta’lim muassasalari va umumta’lim maktablari oldiga hamda yondosh yo‘llariga tezlik me’yorini keskin kamaytirgan holda, 30 km/soatda harakatlanishni bildiruvchi yo‘l belgilari va sun’iy noteksliklar o‘rnatib, to‘liq jihozlash vazifasi yuklanadi.
Ichki ishlar vazirligi esa Xalq ta’limi vazirligi bilan hamkorlikda Davlat yo‘l harakati xavfsizligi xizmati xodimlarini barcha umumta’lim maktablariga biriktiradi va ular tomonidan o‘quvchilarning yo‘l harakati qoidalari borasida savodxonligini oshirish bo‘yicha “sinf soatlari”da yo‘l harakati havfsizligi uchun belgilangan mavzular doirasida bilimlar berib borilishini ta’minlaydi.
Avvalroq Toshkentda 2021-yil boshidan buyon YTHlarda necha kishi halok bo‘lgani ma’lum qilingandi.
Izoh (0)