UzAuto Motors kompaniyasi 2021-yil 5—17-dekabrda ishlab chiqarilgan Nexia, Cobalt va Lacetti avtomobillarini chaqirib olish dasturini e’lon qildi. Bu haqda kompaniya matbuot xizmati xabar berdi.
Ma’lum qilinishicha, UzAuto Motors AJ bosh direktori Bo Andersson bu yil kompaniyaga kelganida sifatni keskin oshirishni va har qanday kamchiliklarga mutlaqo murosasiz munosabatda bo‘lishni e’lon qilgan.
Aynan mana shu sifat talablaridan kelib chiqib, UzAuto Motors 5—17-dekabrda ishlab chiqarilgan Nexia, Cobalt va Lacetti avtomobillarini chaqirib olish dasturini e’lon qiladi. “Chaqirib olish” dasturi avtomobillarning orqa oyna isitish tizimini tekshirish zarurati bilan bog‘liq.
Barcha ishlar UzAuto Motors AJ xodimlari tomonidan dilerlik markazlarining servis xizmatida ishlab chiqaruvchining mablag‘lari hisobidan amalga oshiriladi. Avtomobillarni chaqirib olish dasturiga to‘g‘ri kelgan barcha avtomobil egalari dilerlik markazlari yoki kompaniya tomonidan ogohlantiriladi.
Avvalroq UzAuto Motors fevralgacha Nexia, Spark, Cobalt, Lacetti sotish bo‘yicha yangi arizalar qabul qilishni to‘xtatgani to‘g‘risida xabar berilgandi.
Eslatib o‘tamiz, UzAuto Motors avgust oyida atigi 2 dona Gentra va birorta ham Spark ishlab chiqarmagandi. Kompaniya buni yarimo‘tkazgichlarning global tanqisligi va ishlab chiqarish bosqichma-bosqich transformatsiya qilingani bilan izohlab, shu doirada yagona platformadagi avtomobillarni ishlab chiqarishga o‘tish rejalashtirilganini ma’lum qilgan edi. Sentabr oxirlarida esa kompaniya Lacetti va Spark ishlab chiqarish tiklanganini e’lon qildi. Oktabr boshida esa UzAuto Motors Lacetti ishlab chiqarish hajmini oshirdi. Oktabr oxiriga borib kompaniya Lacetti va Labo yetkazib berishni 2 oyga kechiktirganini ma’lum qildi. Noyabr oxirida esa UzAuto Motors barcha turdagi avtomobillarini yetkazib berishni 2 oyga kechiktirdi.
Izoh (0)