Shavkat Mirziyoyev Janubiy Koreya prezidenti Mun Chje Inning taklifiga binoan 16-dekabr kuni rafiqasi hamrohligida Seulga borgandi. Prezident matbuot xizmati 17-dekabr kuni Janubiy Koreya prezidentining Seuldagi Chong Va De qarorgohida O‘zbekiston prezidentini rasmiy kutib olish marosimi bo‘lib o‘tganini ma’lum qildi.
Qayd etilishicha, O‘zbekiston prezidenti va uning rafiqasi sharafiga faxriy qorovul saf tortdi. Ikki mamlakat davlat madhiyalari yangradi. Tantanali marosimda ushbu mamlakatning qadimiy tarixi va yorqin zamonaviyligi o‘z aksini topdi.
Xabarda aytilishicha, rasmiy kutib olish marosimidan so‘ng davlat rahbarlari ikki mamlakat rasmiy delegatsiyalari ishtirokida muzokara o‘tkazdi.
Bundan avval Shavkat Mirziyoyev rafiqasi hamrohligida Seuldagi milliy qabristondagi yodgorlik poyiga gulchambar qo‘ygani va esdalik bitigi qoldirgani haqida xabar berilgan edi.
Tashrif dasturiga muvofiq, Seulda bo‘lib o‘tadigan oliy darajadagi uchrashuv va muzokaralarda O‘zbekiston—Koreya do‘stlik va alohida strategik sheriklik munosabatlarini yanada mustahkamlash, ko‘p qirrali hamkorlikni kengaytirish yo‘llari ko‘rib chiqiladi. Eng avvalo, “yashil” iqtisodiyot, raqamlashtirish, innovatsiyalar va yuqori texnologiyalar, ta’lim, sog‘liqni saqlash va boshqa ustuvor yo‘nalishlarda amaliy hamkorlik bo‘yicha dastur va loyihalarni ilgari surishga alohida e’tibor qaratiladi.
Shuningdek, Shavkat Mirziyoyev Janubiy Koreya Milliy assambleyasi rahbariyati, ushbu mamlakatning eng yirik kompaniya va bank-moliya institutlari vakillari bilan uchrashadi.
Tashrif 18-dekabrgacha davom etadi va uning yakunida salmoqli ikki tomonlama hujjatlar to‘plami imzolanishi ko‘zda tutilgan.
Mavzuga doir: Seulda Alisher Navoiyga byust o‘rnatildi
Izoh (0)