“O‘zbekneftgaz”ga tegishli zapravkalarda Ai-80 benzin narxi 6500 so‘m etib belgilandi

“O‘zbekneftgaz” AJga qarashli AYoQShlarda 17-dekabr kunidan boshlab Ai-80 markadagi benzin 6890 so‘mdan arzonlashtirilib, har bir litri uchun 6500 so‘m narxda sotuvga chiqarildi. Bu haqda “O‘zbekneftgaz” matbuot xizmati xabar berdi.

Ma’lum qilinishicha, O‘zbekistonda benzin taqchilligining oldini olish va uning narxlarini arzonlashtirish borasida “O‘zbekneftgaz” AJ, Monopoliyaga qarshi kurashish qo‘mitasi va “Tovar xomashyo birjasi” AJ hamkorligida chora-tadbirlar ishlab chiqilgan.

Natijada “O‘zbekneftgaz” AJga qarashli AYoQShlarda 17-dekabr kunidan boshlab Ai-80 markadagi benzin har bir litri uchun 6500 so‘m narxda sotuvga chiqarilgan.

Ta’kidlanishicha, respublika hududidagi “O‘zbekneftgaz”ning barcha AYoQShlarda benzin shu belgilangan narxda sotilishi ta’minlanadi.

Avvalroq “O‘zbekneftgaz” AJga tegishli AYoQShlarda benzin taqchilligi kuzatilgani sababli ijtimoiy tarmoqlarda tanqidiy muhokamalar bo‘lgani, shundan so‘ng kompaniyaga tegishli zapravkalarda Ai-80 benzini narxi pasaygani haqida xabar berilgan edi. Shuningdek, O‘zbekistonda benzin narxi haqida ma’lumot beruvchi Telegram-bot ishga tushirilishi ma’lum qilingandi.

Eslatib o‘tamiz, 17-noyabrdan buyon birja savdolarida Ai-80 benzinining narxida tushish kuzatilmoqda. Shu kuni savdolarda benzin narxi 9 million 365 ming so‘mgacha tushib, 15-noyabrga nisbatan 8 foizga arzonlashgan. 18-noyabr kuni esa 9 million 180 ming 500 so‘mga pasayib, 9 foizga arzonlashgan. 22-noyabr holatiga ko‘ra benzin narxi hamon tushishda davom etmoqda. Birja matbuot xizmatining ma’lum qilishicha, 15–21-noyabr kunlari benzinning kunlik o‘rtacha narxlari mahsulotning bir tonnasi uchun 10 129 400 so‘mdan 9 168 400 so‘mgacha, ya’ni 9,5 foizga pasaygan. 23-noyabr kuni O‘zbekiston birja savdolarida Ai-80 markali benzin narxi bir haftada 15 foizga arzonlashgani ma’lum bo‘ldi.