Samarqand viloyat hokimi Erkinjon Turdimov viloyatni ijtimoiy-iqtisodiy rivojlantirish yuzasidan hamda 2022-yilgi vazifalar borasida xalqqa murojaatida maktablarning shakli hokim va sektor rahbarlari javob berishini ma’lum qildi. Bu haqda “Daryo” muxbiri xabar bermoqda.
“Men har doim aytadigan gapimni yana takrorlamoqchiman. Maktablarning shakli hokim va sektorlarniki, ulardagi ta’limning mazmuni esa hurmatli pedagoglarimizniki. Biz shu maqsadda ishlamas ekanmiz, oldimizga qo‘ygan marralarimizga erisha olmaymiz. Buning uchun kelajak avlod bizni kechirmaydi”, — deydi Erkinjon Turdimov.
Hokimning ma’lum qilishicha, 2020-yilda maktab bitiruvchilarining oliy ta’lim muassasalariga kirish ko‘rsatkichi bo‘yicha qizil toifadagi maktablar soni 142 tani tashkil etgan. Bu esa e’tirozlarga sabab bo‘lgandi. 2021-yilda qizil toifadagi maktablar soni 91 taga kamayib, oliy ta’limga kirish ko‘rsatgichi o‘tgan yilga nisbatdan 2 barobarga ko‘tarilib, 24 foizni tashkil etib, respublikada 5 ta pog‘onaga ko‘tarilgan.
“‘Maktab, maktab, maktab’ shiori bilan ish yuritmasak bo‘lmaydi. Maktabni yomon qilgan siz bilan bizmiz. Nega degan savol tug‘iladi? Farzandingizni maktabga berdingiz, ammo bir oyda bir marta bormaysiz. Darsga kirib, o‘qituvchidan bolamdan so‘rang, deb talab qilsa, o‘zgarish bo‘ladi. Ota-ona bolasini darslariga qiziqmasa, bola baho olganiga qiziqmasa, qanday o‘zgarish bo‘ladi? Biz hammamiz maktab uchun kurashishimiz kerak. Maktabga borib nima qilasan, bozorga bor yoki molni boq desak, nima o‘zgaradi. Eng katta muammo yosh avlod ijtimoiy tarmoqqa kirib olganligi. Yengil-yelpi narsalarga kirib olgan. Yoki o‘yinlarga kiradi. Oxiri tobe bo‘lib qoladi. Hammamiz birlashmasak, maktablarda o‘zgarish bo‘lmaydi. Maktab o‘qituvchisi yomon deganda yonida men ham yomonman, deb tursak, o‘zgarish qila olamiz”, — deydi Erkinjon Turdimov.
Eslatib o‘tamiz, 2021-yilning aprelida Erkinjon Turdimov ishtirokida hududdagi maktabgacha ta’lim tashkilotlari faoliyatiga bag‘ishlangan yig‘ilish bo‘lib o‘tgandi. Unda viloyat Maktabgacha ta’lim boshqarmasi boshlig‘i faoliyatiga qoniqarsiz baho berilgan.
Izoh (0)