Ijtimoiy tarmoqlarda Andijon viloyati YHXB xodimi fuqaroga qo‘pol munosabatda bo‘lgani aks etgan videolavha tarqaldi. Yo‘l harakati xavfsizligi bosh boshqarmasi holatga munosabat bildirdi.
Ma’lum bo‘lishicha, holat yuzasidan Andijon viloyati Ichki ishlar boshqarmasi mas’ul xodimlari tomonidan xizmat tekshiruvi o‘tkazilgan.
Qayd etilishicha, u Vazirlar Mahkamasining “Yo‘l-patrul xizmati xodimlarining yo‘l harakati qatnashchilari bilan o‘zaro munosabatlari hamda maxsus moslamalardan foydalanish tartibi to‘g‘risida”gi nizomi hamda Ichki ishlar vazirining ayrim me’yoriy buyrug‘i talablarini buzgan.
Tekshiruv yakuniga ko‘ra, 27-noyabr kuni xizmat mobaynida haydovchi bilan o‘zaro muloqot jarayonida og‘ir-vazmin bo‘lmasdan, mulohaza bilan ish olib borish o‘rniga, fuqaroga baland ovozda, qo‘pol munosabatda bo‘lgan YPX xodimi B.B. egallab turgan lavozimidan ozod etilgan.
Avvalroq Toshkentda xizmat vaqtida uxlagan va turli nomaqbul harakatlar qilgan YPX xodimi ishdan olingandi. Shuningdek, Toshkentda qoida buzgan haydovchiga chora ko‘rmasdan ketishiga ruxsat bergan YPX xodimiga xizmat tekshiruvi tayinlangani, Jizzaxda haydovchini so‘kkan YPX xodimi ishdan olingani, Qoraqalpog‘istonda haydovchiga qo‘l ko‘targan YPX xodimiga nisbatan xizmat tekshiruvi o‘tkazilayotgani xabar qilingan.
Mavzuga doir:
- Namanganda 2300 kg pistani Qirg‘izistondan olib kirib berish uchun 700 dollar pora olgan IIB xodimi ishdan olindi
- Toshkentda mast holda jamoat tartibini buzgan ichki ishlar organi xodimi lavozimidan ozod etildi
- Qashqadaryoda avtomobilni haydovchi ruxsatisiz jarima maydonchasiga haydab ketgan YPX xodimi ishdan olindi
Izoh (0)