Toshkent shahar Bektemir tuman xalq deputatlari kengashining navbatdagi sessiyasida tuman hokimi Tapil Mahamadziyayev “Qo‘yliq” bozori ko‘chirilishiga oid xabarlarga aniqlik kiritdi. Bu haqda “Yangi davr” ko‘rsatuvida xabar qilindi.
Ma’lum qilinishicha, sessiya ishtirokchilaridan biri hokimga yuzlanib, “ ‘Qo‘yliq’ dehqon bozori va ‘Qo‘yliq’ ulgurji savdo bozorini ko‘chirish masalasi nima bo‘ladi? Tartibi qanday? Qancha muddatda amalga oshiriladi? Food City Bektemir tumaniga taalluqli bo‘ladimi yoki O‘rta Chirchiq tumanigami?”, deya savollar bergan.
Tuman hokimi bunga javoban quyidagilarni keltirib o‘tgan:
Food City Bektemir tumani hududida joylashgan, shu tumanga qaraydi — bu bir. Ikkinchidan, u yerda shundoq sharoitlar yaratilganki, bunaqasi, kerak bo‘lsa, o‘zimizning Ecobozor’da ham yo‘q. Qo‘yliqda asfaltga o‘tirib sotgandan ko‘ra o‘sha yerda olib borib sotgan ma’qul.Kadastri borlarga, albatta, hamma ziyoni davlat tomonidan qoplab beriladi, yuz foiz. Bosqichma-bosqich o‘tiladi.
“Narx-navolar o‘sib ketmaydimi?” degan savolga quyidagicha javob beraman: Food City’da katta, 6x4 metrli to‘rtta monitor bor, bitta aylantirishi 100 million so‘m. U bozorga qo‘shimcha daromad olib keladi. Biz “foydangni shundan olasan, pattachidan emas, sotuvchiga tegmaysan”, deb, 3 oy sotuvchilardan patent puli olmaslik sharti bilan kelishdik.
Hokim sifatida emas, bir fuqaro sifatida aytaman: oxirgi paytlar bozorga tushsak, doim bir narsaga turtilib, bir joyga yiqilib, tan jarohati olishimiz aniq-da. O‘zim ham o‘sha joydan bozor qilaman, majburman shunga. Lekin uni bosqichma-bosqich ko‘chirmasak bo‘lmaydi”.
Eslatib o‘tamiz, 7-dekabr kuni Qo‘yliqda yo‘l infratuzilmasini yaxshilash, kommunikatsiya tarmoqlarini takomillashtirish va tirbandliklarning oldini olish maqsadida ushbu hududda yo‘l kengayishi va ko‘prik qurilishi ishlari rejalashtirilgani va shu sababli Toshkentdagi eng yirik bozorlardan biri boshqa manzilga ko‘chirilishi xabar qilingandi.
9-dekabr kuni esa “bozor buzilishidan norozi odamlar” katta avtoyo‘lni to‘sib qo‘ygani aks etgan videolavha tarqaldi. “Daryo” vaziyat yuzasidan izoh olish maqsadida Toshkent shahar hokimligi, Ichki ishlar vazirligi hamda Toshkent shahar IIBB matbuot xizmatlariga murojaat qildi. Hokimlik matbuot xizmati so‘rovlarga javob bermagan bo‘lsa, huquq-tartibot organlari vakillari “vaziyat bo‘yicha ish olib borilayotgani”ni, yaqin vaqt ichida rasmiy izoh berilishini ma’lum qildi.
Keyinroq “Qo‘yliq” bozori Qo‘yliqdan 6,5 kilometr uzoqlikda, Toshkent viloyatida joylashgan Food City savdo majmuasiga ko‘chirilishi haqida xabarlar tarqaldi. Qayd etilishicha, bozorini ko‘chirish to‘g‘risidagi qaror 2017-yilda qabul qilingan.
“Qo‘yliq” dehqon bozori direktorining xavfsizlik bo‘yicha o‘rinbosari Qodirjon Normirzayevning bergan ma’lumotiga ko‘ra esa, bozor buzilishi yoki ko‘chishi haqida shahar hokimiyati tomonidan xat yoki og‘zaki topshiriq berilmagan.
Izoh (0)