Qoraqalpog‘istonda haydovchiga qo‘l ko‘targan YPX xodimiga nisbatan xizmat tekshiruvi o‘tkazilmoqda

IIV YHXBB ijtimoiy tarmoqda “Qoraqalpog‘istonda haydovchiga qo‘l ko‘taradigan YPX xodimi” sarlavhasi ostida tarqalgan videolavha yuzasidan ma’lumot berdi.

Ma’lum qilinishicha, 18-may kuni soat 11:15 larda Qoraqalpog‘iston Respublikasi Xo‘jayli tumani Nukus guzari ko‘chasida xizmat olib borayotgan YPX inspektori A.Yeshmurzayev tomonidan haydovchi T.B. boshqaruvida bo‘lgan Isuzu rusumli transport vositasi piyodaga yo‘l bermagani uchun to‘xtatilgan va unga qoidabuzarlik bo‘yicha tushuntirish berilgan.

Shundan so‘ng haydovchi qoidabuzarlikni tan olmay qo‘l telefoniga tasvirga olishni boshlagan vaqtda, haydovchining otasiman deb tanishtirgan fuqaro inspektorga avtomobilning hujjatlarini olib berib, qog‘oz bayonnomaga rasmiylashtirishni so‘ragan. Bayonnoma rasmiylashtirilganidan so‘ng, haydovchi imzo qo‘yishdan bosh tortgan va YPX inspektori bilan haydovchi o‘rtasida nizoli vaziyat kelib chiqqan.

Mazkur holat yuzasidan Qoraqalpog‘iston Respublikasi IIV YHXB tomonidan xizmat tekshiruvi o‘tkazilmoqda.

Avvalroq Toshkent viloyatida o‘zini “Oysha xola” deya tanishtirgan YPX xodimiga xizmat tekshiruvi tayinlangani, Toshkentda YPX inspektori haydovchiga o‘rta barmog‘ini ko‘rsatgani, poytaxtda quvvati tugaganini aytib, ishlamayotgan bodikamera bilan tekshiruv o‘tkazgan YPX xodimiga chora ko‘rilgani hamda Samarqandda YPX inspektorlari fuqaroni kuch ishlatib, xizmat mashinasida olib ketgani aks etgan video bo‘yicha rasmiy izoh berilgani haqida xabar berilgandi.