Qashqadaryoda ishchilaridan salkam 2 mlrd so‘m qarzdorligi bo‘lgan tashkilot xodimlari viloyat hokimligida to‘plandi

Qashqadaryo viloyati hokimligi binosi oldida to‘plangan “Qashqadaryo neft-gaz qurilish va ta’mirlash” xodimlari besh-olti oydan beri maosh olmay ishlab kelayotganini aytib, hokim Murodjon Azimovdan yordam so‘radi. Bu haqda norozi ishchilar bilan suhbatlashgan “Daryo” muxbiri xabar berdi.

Ma’lum bo‘lishicha, 11-dekabr kuni “Qashqadaryo neft-gaz qurilish va ta’mirlash” AJning 30 nafarga yaqin ishchi xodimlari viloyat hokimligi oldida to‘planib, maoshsiz ishlayotgani bois oilasida muammo yuzaga kelganini aytib, viloyat rahbari bilan uchrashishni talab qilgan.

“Rahbarimiz Asliddin Rahmatov sheriklari Rufat Omonov va Qahramon Sultonov bilan birgalikda tashkilotimizni bankrot qildi. Olti oydan beri oylik maosh olmaymiz. Ro‘zg‘orimiz bizning qo‘limizga qaragan, ammo bizga oylik-maosh berilmayapti. Bormagan tashkilotimiz, shikoyat qilmagan rahbarimiz qolmadi. Endi viloyat hokimi qabuliga keldik”, — dedi “Daryo” muxbiri bilan suhbatlashgan tashkilot xodimi Faxriddin Davlatov.

Uning aytishicha, bundan to‘rt yil avval tashkilotda 1200 dan ortiq ishchi bo‘lgan. Ayni paytda 100 dan ortiq ishchi qolgan, xolos.

Tashkilot ishchi xodimi Fayzi Temirovning aytishicha, ishchilar 2021-yilning 8-noyabridan beri ish tashlagan.

“Har safar oylikni so‘rasak, ‘bo‘ladi-bo‘ladi’ deya aldab kelishdi. Shu bois 8-noyabrdan beri ishlamayapmiz. Bizga kimdir yordam beradimi, deya viloyat hokimi oldiga keldik”, — deydi Fayzi Temirov.

Tashkilotning yana bir xodimi Bahrom Erkayev esa o‘zlariga biriktirilgan qurilish ishlarini vaqtida bajarib kelishsa-da, har doim “qarzingiz bor” degan bahona qilinib, ishchilarga moash berilishi ortga surib kelinganini aytmoqda.

“Biz har doim katta-katta qurilishlarni bajaramiz. Ammo oylik maoshimizga kelganda “qarzlaring bor” deb, yana oylikni berishmayapti. Mana olti oydirki, oylik yo‘q. Oyliksiz ishlayapmiz”, — deydi Bahrom Erkayev.

Murojaatchilarning qo‘shimcha qilishicha, 11-dekabr kuni hokim Murodjon Azimov ishchilar bilan ko‘rishgan. Viloyat hokimi tashkilot rahbari Asliddin Rahmatovni oldiga chaqirtirgan va ishchilar maoshini to‘lab berishi uchun uch kun muhlat bergan.

“Daryo” muxbiri bilan suhbatlashgan Asliddin Rahmatov ayni kunda tashkilotidagi mavjud 212 nafar ishchisining oylik maoshidan 1 milliard 850 million so‘m qarzdorligi mavjudligini aytdi.

Uning qayd etishicha, viloyat Injiniring kompaniyasi buyurtmachilik asosida qurilgan Qarshi shahridagi “Vatanparvarlar bog‘i” qurilishi uchun tashkilotga to‘lab berilishi lozim bo‘lgan 2 milliard 700 million so‘m mablag‘ hamon to‘lanmagani, ishchilari maoshining kechikishiga sabab bo‘lgan omillardan biri ekan.

“Viloyat hokimi besh-olti kun muhlat berdi. Shu muddat ichida muammoni hal qilamiz”, — deydi tashkilot rahbari Asliddin Rahmatov.

Murojaatchilarning qo‘shimcha qilishicha, 2021-yilning 14-dekabr kuni qarzdorligi mavjud tashkilot rahbari Asliddin Rahmatov ishdan olingan. Ammo muammo haligacha o‘z yechimini topmagan.