G‘uzorda 42 yoshli erkak ko‘chadan o‘lik holda topildi. Marhumning yaqinlari uning o‘ldirilganini aytmoqda

Qashqadaryo viloyatining G‘uzor tumanida 42 yoshli erkak ko‘chadan o‘lik holda topildi. Bu haqda “Daryo”ga xabar bergan marhumning turmush o‘rtog‘i eri o‘ldirib ketilgan bo‘lishi mumkinligini aytmoqda.

Ma’lum bo‘lishicha, voqea 2021-yilning 10-oktabr kuni sodir bo‘lgan.

“O‘sha kuni turmush o‘rtog‘im Saidali aka uyga vaqtliroq qaytdi. O‘zi mardikorlik qilardi. Hovliga kirishi bilan hovli darvozasini yopdi. Hali kech bo‘lmagan-ku, nega darvozani yopyapsiz deganimdan keyin, hali kech bo‘lmadimi deya yana darvozani ochib qo‘ydi. Keyin uyga kirib o‘zi choy qo‘ydi va bolalari bilan gaplashib o‘tirdi.

Birozdan so‘ng esa o‘g‘limning kiyimini kiyib, uydagi velosipedni mingancha men do‘konga chiqib, bolalarga shirinlik va sening paxta terishing uchun qo‘lqop olib kelaman deya chiqib ketdi. Keyin bilsam o‘sha kuni va o‘sha soatda erimni oxirgi marta ko‘rib turgan ekanman”, — dedi marhumning bevasi Dildora Quvvatova.

Dildora Quvvatova 2021-yilning 10-noyabriga qadar turmush o‘rtog‘i velosipeddan yiqilib o‘lgan degan gapga ishonib yurganini, ammo tibbiyot ekspertizasi xulosasini ko‘rgach, eri o‘ldirilgan degan taxminga borayotganini aytmoqda.

“O‘sha kuni kech soat 11 da menga qo‘ng‘iroq qilishib, ering velosipeddan yiqilib tushdi deyishdi. Keyinroq bilsam, erim vafot etgan ekan. O‘sha kuni voqeani o‘rgangan IIB va prokuratura xodimlari erimning velosipeddan yiqilib o‘lganini aytgandi.

2021-yilning 10-noyabr kuni esa tibbiyot ekspertizasini qo‘limga olsam, unda erimning o‘tmas jism bilan urib jarohatlangani, o‘limiga shu sabab bo‘lgani yozilgan ekan. Shundan so‘ng, menda erim o‘ldirilgan degan shubha paydo bo‘ldi”, — dedi marhumaning xotini.

Dildora Quvvatova erining o‘limi sabablari yozilgan tibbiyot ekspertiza xulosasi olinganidan so‘ng, mahalla profilaktika inspektori ishdan bo‘shab ketganini, qolgan mas’ullar esa erining o‘limi sabablari bilan qiziqmayotganini bildirmoqda.

“Hech kim so‘ramayapti. Erim nega o‘ldi, kim o‘ldirdi. Kimga kerak bu qotillik, hech bir rahbar qiziqmayapti. Men esa erimning qotilini topishdan umidvorman”, — dedi Dildora Quvvatova.

“Daryo” so‘roviga javob bergan viloyat prokuraturasi axborot xizmati rahbari Sohibjon G‘aybullayev mazkur holat yuzasidan tergovga qadar tekshiruv harakatlari olib borilayotganini, biroq hozircha jinoyat ishi qo‘zg‘atilmaganini bildirdi.

“Bu haqda tez orada batafsil ma’lumot beramiz”, — dedi Sohib G‘aybullayev.