Namangan viloyatida hech qanday veterinariya-sanitariya hujjatlarsiz go‘sht mahsulotlarini olib ketayotgan Lacetti to‘xtatildi, deb xabar beradi IIV matbuot xizmati.
Ma’lum qilinishicha, 12-dekabr kuni soat 16:30 da “Namangan” YPX maskaniga jalb etilgan Namangan viloyati IIB PPX va JTSB Karantin tadbirlarini ta’minlash bo‘linmasi hamda viloyat veterinariya va chorvachilikni rivojlantirish boshqarmasi xodimlari bilan hamkorlikda tadbir o‘tkazilgan. Tadbir davomida Farg‘ona—Toshkent yo‘nalishida harakatlanib kelayotgan Qo‘shtepa tumanida yashovchi T.Y.ga tegishli bo‘lgan Lacetti to‘xtatilgan.
Tekshiruv davomida mashina yukxonasida polietilen qoplarga joylashtirilgan hech qanday veterinariya-sanitariya hujjatlarsiz, sanitariya-gigiyena talablariga zid ravishda noma’lum sharoitida tayyorlangan fuqaro U.N.ga tegishli 150 kilogramm go‘sht mahsulotlari olib ketilayotgani aniqlangan.
Mazkur go‘sht mahsulotlari viloyat veterinariya va chorvachilikni rivojlantirish bo‘limi Oziq-ovqat mahsulotlari xavfsizligi mikrobiologiya va veterinariya-sanitariya ekspertiza laboratoriyasining xulosasiga ko‘ra iste’mol uchun yaroqsiz deb topilgan.
Hozirgi kunda yuqoridagi holat yuzasidan surishtiruv ishlarini olib borilmoqda.
Avvalroq Toshkentdagi “Aviasozlar” bozorida iste’molga yaroqsiz go‘sht aniqlangani, Qarshida Nexia yukxonasida 250 kiloga yaqin iste’molga yaroqsiz go‘sht olib ketilayotgani aniqlanib, yo‘q qilingani, Toshkentdan Xorazmga olib ketilayotgan 1 tonnaga yaqin iste’molga yaroqsiz go‘sht to‘xtatib qolingani to‘g‘risida xabar berilgandi.
Izoh (0)