Тошкент шаҳар Бектемир туман халқ депутатлари кенгашининг навбатдаги сессиясида туман ҳокими Тапил Маҳамадзияев «Қўйлиқ» бозори кўчирилишига оид хабарларга аниқлик киритди. Бу ҳақда «Янги давр» кўрсатувида хабар қилинди.
Маълум қилинишича, сессия иштирокчиларидан бири ҳокимга юзланиб, « ‘Қўйлиқ’ деҳқон бозори ва ‘Қўйлиқ’ улгуржи савдо бозорини кўчириш масаласи нима бўлади? Тартиби қандай? Қанча муддатда амалга оширилади? Food City Бектемир туманига тааллуқли бўладими ёки Ўрта Чирчиқ туманигами?», дея саволлар берган.
Туман ҳокими бунга жавобан қуйидагиларни келтириб ўтган:
Food City Бектемир тумани ҳудудида жойлашган, шу туманга қарайди — бу бир. Иккинчидан, у ерда шундоқ шароитлар яратилганки, бунақаси, керак бўлса, ўзимизнинг Ecobozor’да ҳам йўқ. Қўйлиқда асфальтга ўтириб сотгандан кўра ўша ерда олиб бориб сотган маъқул.Кадастри борларга, албатта, ҳамма зиёни давлат томонидан қоплаб берилади, юз фоиз. Босқичма-босқич ўтилади.
«Нарх-наволар ўсиб кетмайдими?» деган саволга қуйидагича жавоб бераман: Food City’да катта, 6х4 метрли тўртта монитор бор, битта айлантириши 100 миллион сўм. У бозорга қўшимча даромад олиб келади. Биз «фойдангни шундан оласан, паттачидан эмас, сотувчига тегмайсан», деб, 3 ой сотувчилардан патент пули олмаслик шарти билан келишдик.
Ҳоким сифатида эмас, бир фуқаро сифатида айтаман: охирги пайтлар бозорга тушсак, доим бир нарсага туртилиб, бир жойга йиқилиб, тан жароҳати олишимиз аниқ-да. Ўзим ҳам ўша жойдан бозор қиламан, мажбурман шунга. Лекин уни босқичма-босқич кўчирмасак бўлмайди».
Эслатиб ўтамиз, 7 декабрь куни Қўйлиқда йўл инфратузилмасини яхшилаш, коммуникация тармоқларини такомиллаштириш ва тирбандликларнинг олдини олиш мақсадида ушбу ҳудудда йўл кенгайиши ва кўприк қурилиши ишлари режалаштирилгани ва шу сабабли Тошкентдаги энг йирик бозорлардан бири бошқа манзилга кўчирилиши хабар қилинганди.
9 декабрь куни эса «бозор бузилишидан норози одамлар» катта автойўлни тўсиб қўйгани акс этган видеолавҳа тарқалди. «Дарё» вазият юзасидан изоҳ олиш мақсадида Тошкент шаҳар ҳокимлиги, Ички ишлар вазирлиги ҳамда Тошкент шаҳар ИИББ матбуот хизматларига мурожаат қилди. Ҳокимлик матбуот хизмати сўровларга жавоб бермаган бўлса, ҳуқуқ-тартибот органлари вакиллари «вазият бўйича иш олиб борилаётгани»ни, яқин вақт ичида расмий изоҳ берилишини маълум қилди.
Кейинроқ «Қўйлиқ» бозори Қўйлиқдан 6,5 километр узоқликда, Тошкент вилоятида жойлашган Food City савдо мажмуасига кўчирилиши ҳақида хабарлар тарқалди. Қайд этилишича, бозорини кўчириш тўғрисидаги қарор 2017 йилда қабул қилинган.
«Қўйлиқ» деҳқон бозори директорининг хавфсизлик бўйича ўринбосари Қодиржон Нормирзаевнинг берган маълумотига кўра эса, бозор бузилиши ёки кўчиши ҳақида шаҳар ҳокимияти томонидан хат ёки оғзаки топшириқ берилмаган.
Изоҳ (0)