Belarus Markaziy saylov komissiyasiga (MSK) yangi rahbar tayinlandi. Ushbu lavozimni avval ta’lim vaziri bo‘lib ishlagan Igor Karpenko egalladi. Bu haqda Belarus davlat agentligi “Belta” xabar berdi.
Aleksandr Lukashenko Karpenkoni Markaziy saylov komissiyasi rahbari etib tayinlar ekan, uni tajribali shaxs deb atadi hamda oldinda uni “mashaqqatli kunlar” kutayotganini aytdi.
“(Konstitutsiyaga o‘zgartirishlar kiritish to‘g‘risidagi) referendumdan boshlab... Keyin tarixda ilk bor bir ovoz berish kunida kengashlarni va hokimiyatning qonun chiqaruvchi organi – parlamentni saylashimiz kerak. Va, albatta, prezidentlik saylovlari: ularga hali uzoqdek tuyuladi, ammo aslida unchalik emas. Hammasi mamlakatimizda qanday vaziyat yuzaga kelishiga bog‘liq bo‘ladi”, — dedi Lukashenko.
Karpenko Belarus Markaziy saylov komissiyasi rahbari sifatida Lidiya Yermoshinaning o‘rnini egalladi. Yermoshina 1992-yilda komissiya tarkibiga kirgan, 1996-yildan unga rahbarlik qilgan. Undan avvalgi MSK rahbari Viktor Gonchar Lukashenkoning sobiq safdoshi bo‘lgan, so‘ng muxolifat safiga qo‘shilgan. U Lukashenkoning parlamentdan tashqari qarori bilan MSK rahbari lavozimidan chetlatilgan edi, oradan uch yil o‘tgach esa bedarak yo‘qolgan. Gonchar, Lukashenkoning boshqa bir qancha raqiblari singari, Belarus “SOBR” (Maxsus tezkor javob qaytarish otryadi) askarlari tomonidan o‘ldirilgani haqida dalillar mavjud.
Lidiya Yermoshina MSK rahbari sifatida Belarusda ikki marta referendum o‘tkazdi, ular Lukashenkoning vakolatlarini kengaytirdi (xususan, u cheksiz marta prezidentlikka nomzodini qo‘yish imkoniyatiga ega bo‘ldi), shuningdek, ushbu 25 yillik davr mobaynida besh marta prezidentlik saylovlari o‘tkazildi.
Ulardan oxirgisi 2020-yil avgust oyida bo‘lib o‘tdi va yana bir bor davlat rahbari deb e’lon qilingan Lukashenkoga qarshi Belarus tarixidagi eng ommaviy norozilik namoyishlariga sabab bo‘ldi.
Izoh (0)