Беларусь Марказий сайлов комиссиясига (МСК) янги раҳбар тайинланди. Ушбу лавозимни аввал таълим вазири бўлиб ишлаган Игорь Карпенко эгаллади. Бу ҳақда Беларусь давлат агентлиги «Belta» хабар берди.
Александр Лукашенко Карпенкони Марказий сайлов комиссияси раҳбари этиб тайинлар экан, уни тажрибали шахс деб атади ҳамда олдинда уни «машаққатли кунлар» кутаётганини айтди.
«(Конституцияга ўзгартиришлар киритиш тўғрисидаги) референдумдан бошлаб... Кейин тарихда илк бор бир овоз бериш кунида кенгашларни ва ҳокимиятнинг қонун чиқарувчи органи – парламентни сайлашимиз керак. Ва, албатта, президентлик сайловлари: уларга ҳали узоқдек туюлади, аммо аслида унчалик эмас. Ҳаммаси мамлакатимизда қандай вазият юзага келишига боғлиқ бўлади», — деди Лукашенко.
Карпенко Беларусь Марказий сайлов комиссияси раҳбари сифатида Лидия Ермошинанинг ўрнини эгаллади. Ермошина 1992 йилда комиссия таркибига кирган, 1996 йилдан унга раҳбарлик қилган. Ундан аввалги МСК раҳбари Виктор Гончар Лукашенконинг собиқ сафдоши бўлган, сўнг мухолифат сафига қўшилган. У Лукашенконинг парламентдан ташқари қарори билан МСК раҳбари лавозимидан четлатилган эди, орадан уч йил ўтгач эса бедарак йўқолган. Гончар, Лукашенконинг бошқа бир қанча рақиблари сингари, Беларусь «СОБР» (Махсус тезкор жавоб қайтариш отряди) аскарлари томонидан ўлдирилгани ҳақида далиллар мавжуд.
Лидия Ермошина МСК раҳбари сифатида Беларусда икки марта референдум ўтказди, улар Лукашенконинг ваколатларини кенгайтирди (хусусан, у чексиз марта президентликка номзодини қўйиш имкониятига эга бўлди), шунингдек, ушбу 25 йиллик давр мобайнида беш марта президентлик сайловлари ўтказилди.
Улардан охиргиси 2020 йил август ойида бўлиб ўтди ва яна бир бор давлат раҳбари деб эълон қилинган Лукашенкога қарши Беларусь тарихидаги энг оммавий норозилик намойишларига сабаб бўлди.
Изоҳ (0)