Ichki ishlar vazirligi matbuot kotibi Shohrux G‘iyosov rahbariyatidan topshiriq olgan IIB xodimlarining berilgan topshiriqni ko‘r-ko‘rona bajarishga urinishini qoraladi. Bu haqda Denov shahrida portlash bilan bog‘liq vaziyatga oydinlik kiritish maqsad qilingan matbuot brifingidan keyin bo‘lib o‘tgan matbuot anjumanida ma’lum qilindi, deya xabar berdi “Daryo” muxbiri.
Ta’kidlanishicha, Denov shahrida viloyat hokimi To‘ra Bobolov, sog‘liqni saqlash vazirining birinchi o‘rinbosari Amrullo Inoyatov, bosh prokuratura boshqarma boshlig‘i o‘rinbosari Doniyor Masaliyev, favqulodda vaziyatlar vazirligi bosh boshqarma boshlig‘i O‘lmas Muzaffarov ishtirokidagi matbuot brifingidan so‘ng ichki ishlar vazirining matbuot kotibi ishtirokida matbuot anjumani tashkil etilgan.
Matbuot anjumanida so‘z olgan “Daryo” muxbiri portlashdan jabrlanganlar bilan suhbatda bo‘lish maqsadida Denov tuman tibbiyot birlashmasida bo‘lganini, shifoxonada davolanayotgan to‘rt nafar bemorni ko‘rib, suhbatlashishga muvaffaq bo‘lganini, ammo qolgan uch nafar bemor bilan suhbatiga IIB xodimi to‘sqinlik qilganini aytib, vaziyatga izoh so‘ragan.
Shohruh G‘iyosov muxbirning “O‘zini viloyat IIB xodimi Sherzod deya tanishtirgan va guvohnomasini ko‘rsatgan fuqaro kiyimidagi xodim bizning qolgan uch nafar bemor bilan ham suhbatda bo‘lishimizga to‘sqinlik qilib, buning uchun ruxsat berilmaganini aytdi. Va OAV vakillari faoliyatiga qarshilik ko‘rsatdi. Boshqa OAV vakillari bilan ham shunday holat takrorlanmasligi, jurnalistlarning erkin axborot olishi uchun vazirlik buni nazoratga oladimi”, deya bergan savoliga “Bizning eng katta aybimiz ham shu ekan aslida”, — deya vaziyatga baho berdi.
“Ko‘p xodimlarimiz 'soldat' bo‘lib qolgan. Menga shu topshiriqni berishdi, demak men shuni qilishim kerak degan tushuncha bilan xato qilishda davom etadi. Aslida biz ana shu kamchiligimizdan qutilishimiz kerak”, — dedi Shohrux G‘iyosov.
IIV matbuot kotibi avvalroq bo‘lib o‘tgan tadbirlarning birida IIB xodimlari, voqea joyiga hatto tez yordam mashinasini ham ichkariga kiritmaganini bildirdi.
“Avvalroq bo‘lib o‘tgan voqeani aytib bermoqchiman. Shunaqa xodimlarimiz ham bor ekanki, topshiriqni olgach, hatto tez yordam mashinasini ham voqea joyiga kiritishmagan. Boshqarma boshlig‘i o‘rinbosarlaridan birining aytichicha, bir voqeada xodimlar hududga kelgan senatorga ham “Siz ichkariga kirib-chiquvchilar ro‘yxatida yo‘qsiz”, deya ichkariga kirishni taqiqlagan”, — dedi matbuot kotibi.
Shohruh G‘iyosov “Daryo” muxbirlari faoliyatiga qarshilik ko‘rsatib, ularning axborot olishiga to‘sqinlik qilgan IIB xodimi ishi bilan o‘zi shug‘ullanib, tahririyatga bu haqda qo‘shimcha ma’lumot berilishini aytdi.
Eslatib o‘tamiz, Surxondaryoning Denov shahri markazidagi “Indenim” savdo majmuasida 7-dekabr tongida kuchli portlash yuz berdi. Rasmiy ma’lumotlarga ko‘ra, portlash oqibatida kamida ikki kishi halok bo‘lgan, 11 kishi turli tan jarohatlari bilan shifoxonaga yotqizilgan. Keyinchalik Denovdagi portlashda 65 ta uy zarar ko‘rgani, 6 ta xonadon devorlari esa yorilib, yashash uchun xavfli holatga kelib qolgani ma’lum bo‘ldi. Dastlabki taxminlarga ko‘ra, gaz asbob-uskunalaridan foydalanish qoidalarining buzilishi oqibatida to‘plangan gaz-havo aralashmasining chaqnashi oqibatida yuz bergan.
Izoh (0)