Шавкат Мирзиёев 2 декабрь куни Абу-Даби валиаҳди, Бирлашган Араб Амирликлари Қуролли кучлари олий бош қўмондони ўринбосари Шайх Муҳаммад бин Зоид ал-Наҳаён ва БАА бош вазири ўринбосари, Президент ишлари бўйича вазири Шайх Мансур бин Зоид ал-Наҳаён билан телефон орқали мулоқот қилди. Бу ҳақда Президент матбуот хизмати хабар қилди.
Маълум қилинишича, давлат раҳбари амирликлар раҳбарияти ва халқини ушбу мамлакат ташкил топганининг 50 йиллиги билан самимий қутлаб, тинчлик-осойишталик, фаровонлик, бардавом тараққиёт ва равнақ тилаган. Суҳбатда кўп қиррали Ўзбекистон—БАА ҳамкорлиги кун тартибидаги долзарб масалалар кўриб чиқилган. Узоқ муддатли шерикликнинг янги илғор йўналиш ва дастурларини белгилаб олиш мақсадида фаол мулоқот ва алмашинувларни давом эттириш муҳим экани қайд этилган.
Қайд этилишича, қўшма инновацион лойиҳалар ва молиявий-техник кўмак дастурларини амалга ошириш масаласига алоҳида эътибор қаратилиб, бунда Дубайдаги EXPO бутунжаҳон кўргазмасида ҳам ўз ифодасини топган мамлакатлар салоҳиятини ҳисобга олиш лозимлиги таъкидланган.
«Истиқболли лойиҳаларнинг янги портфелини шакллантириш учун яқин фурсатда ҳукуматлар делегацияларининг икки томонлама учрашувларини ўтказишга келишиб олинди», — дейилади хабарда.
Изоҳ (0)