Shavkat Mirziyoyev YuNESKO bosh direktori lavozimiga qayta saylangan Odri Azuleni tabrikladi

Prezident Shavkat Mirziyoyev YuNESKO bosh direktori Odri Azulega maktub yo‘llab, uni lavozimga qayta saylagani munosabati bilan tabrikladi. Bu haqda Prezident matbuot kotibi Sherzod Asadov xabar qildi.

“Nomzodingiz keng qo‘llab-quvvatlangani tinchlikni ta’minlash va barqaror rivojlanish maqsadlariga erishish borasidagi faol sa’y-harakatlaringiz va tashkilotingiz qo‘shayotgan katta hissaning navbatdagi tasdig‘i bo‘ldi.

Sizning ushbu lavozimdagi muvaffaqiyatli va natijador faoliyatingiz, siz tomondan ilgari surilayotgan muhim tashabbuslar va gumanitar loyihalar pandemiya davrida YuNЕSKOning muvofiqlashtiruvchi sifatidagi o‘rni mustahkamlanishi va xalqaro nufuzi yuksalishiga xizmat qildi”, deyiladi maktubda.

Qayd etilishicha, davlat rahbari O‘zbekiston va YuNЕSKO o‘rtasidagi yaqin va ko‘p qirrali munosabatlarni kengaytirishga bosh direktor tomonidan alohida e’tibor qaratilayotganini yuksak qadrlashini ta’kidlagan.

“Ochiq va sermahsul uchrashuvlarimiz sherikligimizning salohiyatini ro‘yobga chiqarish va keng qamrovli mamlakat dasturini amalga oshirishga kirishishga imkon bergani haqidagi fikringizga to‘liq qo‘shilaman.

Sizning ko‘magingiz bilan ‘Xiva jarayoni’ — tashkilot faoliyatining butun kun tartibi bo‘yicha Markaziy Osiyoda xalqaro hamkorlikning yangi platformasi ishga tushirildi. Ushbu tashabbus mintaqamizda YuNЕSKO bilan amaliy hamkorlikning kengayishi va muhim vazifalarning ilgari surilishiga xizmat qilishi shubhasiz”, deya qo‘shimcha qilgan prezident.

Ta’kidlanishicha, maktub yakunida davlat rahbari uning O‘zbekiston prezidenti lavozimiga qayta saylangani munosabati bilan yo‘llangan tabrigi uchun Odri Azulega minnatdorlik bildirib, unga mustahkam sog‘lik va faoliyatiga katta muvaffaqiyatlar tilagan.

Eslatib o‘tamiz, O‘zbekiston YuNESKO bosh direktori saylovida amaldagi rahbar Odri Azule nomzodini qo‘llab-quvvatlashi ma’lum bo‘lgandi.