“Kalmar o‘yini” Gotham Awards versiyasiga ko‘ra yil seriali deb topildi

Koreyalik rejissor tomonidan ishlangan “Kalmar o‘yini” eng yaxshi to‘liq metrajli yil seriali sifatida e’tirof etilib, Amerikaning kinotanqidchilar, jurnalistlar, dasturchilar va film kuratorlaridan iborat qo‘mita tomonidan Gotham Awards mukofotiga loyiq deb topildi. Bu haqda Esquire xabar beradi.

“12 yil avval, 2009-yil ushbu ssenariyni yozganimda, bor kuchim bilan harakat qilganman, ammo u hech kimga yoqmagan. Menga ssenariyning haddan ortiq darajada shafqatsiz, mavhum va g‘alati ekanini aytishgan. Premyeradan keyin esa serialning dunyodagi eng mashhur shou bo‘lishi uchun atigi 12 kun kerak bo‘ldi”, — degan rejissor Xvan Don Xyok.

Serialda bosh qahramon rolini ijro qilgan Li Chon Je ham “Yangi serialdagi ajoyib aktyorlik ijrosi” yo‘nalishiga nomzod bo‘lgan, ammo mukofot boshqa bir ijodkorga nasib qilgan.

Gotham Awards’ning 31-taqdirlash marosimi Nyu-Yorkda bo‘lib o‘tgan. Ma’lumot uchun, ushbu mukofotga budjeti 35 milliondan kam bo‘lmagan loyihalargina nomzod bo‘lishi mumkin.

“Eng yaxshi film” yo‘nalishida Meggi Jillenxolning debyut ishi “Notanish qiz” (“ The lost daughter”) mukofotga loyiq deb topilgan. Ushbu filmda ona bo‘lganiga ancha bo‘lgan o‘rta yoshli ayolning ilk farzandli bo‘lgandagi kechinmalarni eslashi haqida hikoya qilinadi. 2020-yilda rejissor Xloi Chjaoning “Ko‘chmanchilar mamlakati” (“Nomadland”) seriali eng yaxshi deb topilgan va keyinroq xuddi shu yo‘nalish bo‘yicha “Oskar”ga ham sazovor bo‘lgandi.

Jillenxol, shuningdek, “Eng yaxshi ssenariy” va “Rejissorlar orasidagi yangilik” bo‘yicha ham mukofotni qo‘lga kiritgan. “Notanish qiz” (“The lost daughter”)da bosh qahramonni gavdalantirgan Oliviya Kolman esa “Eng yaxshi bosh rol ijrosi” yo‘nalishi bo‘yicha mukofotni “Kennet Chemberlenning o‘ldirilishi” (“Killing of Kenneth Chamberlain”) filmida suratga tushgan Frenki Feyson bilan bo‘lishgan.

“Eng yaxshi xorijiy loyiha” deb esa Ryusuke Xamagutining “Mashinamni boshqar” (“Drive my car”) filmi topilgan. Sujetga ko‘ra, kartina qahramoni — teatr rejissoriga Anton Chexovning “Vanya amaki” “(Dyadya Vanya”) pyesasini sahnalashtirish taklif qilinadi. U va uning qo‘l ostida haydovchi bo‘lib ishlaydigan qiz bilan o‘rtalarida munosabatlar paydo bo‘ladi. Avvalroq mazkur film fransuz jurnali Cahiers du Cinéma versiyasi bo‘yicha yil filmlarining o‘ntalik ro‘yxatidan o‘rin olgan.