Ижтимоий тармоқларда Тошкент шаҳри Мирзо Улуғбек туманида 17 ёшли мактаб ўқувчиси ҳазил видео олиш учун автомобиль йўли ўртасида чўмилгани тўғрисида хабар берилганди. Туман ҳокимлиги матбуот хизматининг маълум қилишича, ушбу фуқаронинг иши Болаларни ҳимоя қилиш масалалари бўйича комиссияда кўриб чиқилган.
Мирзо Улуғбек номидаги Мафифидум мактабининг ўқувчилари 17 ёшли Т.С. ва О.М. Буюк ипак йўли кўчасининг автомобиллар ҳаракати қисмида ҳаёти учун хавфли бўлган (тренд) ноодатий ҳаракатларни амалга оширган. Хусусан, ижтимоий тармоқларда тарқалган видеода Т.С. ўзининг устидан бир челак сув сепиб, югургани акс этган.
Маълум қилинишича, туман ҳокимлиги Болаларни ҳимоя қилиш масалалари бўйича комиссиясида ушбу ўқувчилар ҳаракатига қонуний чора кўрилган. Маъмурий жавобгарлик тўғрисидаги кодекснинг 47-модда (болаларни тарбиялаш ва уларга таълим бериш борасидаги мажбуриятларни бажармаслик) 1-қисмига асосан ҳар бир ўқувчининг ота-онасига жарима жазоси қўлланган.
Мазкур ҳуқуқбузарлик учун БҲМнинг бир бараваридан беш бараваригача миқдорда (1,35 миллион сўм) жарима солиниши кўзда тутилган.
Аввалроқ Тошкентда Spark устида шеригини боғлаб, TikTok учун ролик суратга олган блогерлар 10 суткага қамалгани, Бухорода TikTok учун дрифт қилган ҳайдовчига чора кўрилиб, «Жигули»си жарима майдонига жойлаштирилгани тўғрисида хабар берилганди.
Изоҳ (0)