SSV: O‘zbekistonda 12—14 yoshli qizlar papilloma virusiga qarshi emlanmoqda

O‘zbekistonda 12—14 yoshli qizlar o‘rtasida odam papilloma virusiga qarshi emlanmoqda, deb xabar qildi Sog‘liqni saqlash vazirligi.

Ma’lum qilinishicha, har yili O‘zbekistonda o‘rtacha 1700 nafarga yaqin ayolda odam papilloma virusi sababli bachadon bo‘yni saratoni kasalligi aniqlanmoqda. Kasallikka qarshi rejali emlanish saraton holatlarining oldini olishga yordam beradi.

“Bunday vaksinalar xotin-qizlarning sog‘lom va uzoq umr ko‘rishini ta’minlaydi. Dunyoning 102 mamlakatida milliy emlash dasturiga 9 yoshdan boshlab qizlarni emlash kiritilgan. O‘zbekiston ham 2019-yildan ana shu davlatlar safiga qo‘shildi”, — deydi Sanitariya-epidemiologik osoyishtalik va jamoat salomatligi xizmati bo‘lim boshlig‘i Dilorom Tursunova.

Qayd etilishicha, emlash jarayonlari uchun joylarga ehtiyojga ko‘ra 1 million 400 ming doza OPV vaksina va shpritslari yetkazib berilgan. Bunday vaksinalarning 270 milliondan ortiq dozasi dunyoning 102 davlatida qo‘llanilgan. Hozirgi kunda mamlakatga Niderlandiyaning “Merk” korxonasida ishlab chiqarilgan 1 million 400 ming doza “Gardasil” vaksinasi olib kelingan va yaroqliligi tekshirilib, tasdiqlangan. Ayni paytda respublika bo‘yicha vaksinatsiya jarayonlari 3138 ta emlash punktida amalga oshirilmoqda.

Eslatib o‘tamiz, O‘zbekistonda har yili bachadon bo‘yni saratoniga chalingan ikki mingga yaqin ayolning 42 foizdan ortig‘i vafot etadi.

Bundan tashqari, OPVga qarshi emlash orqali bachadon bo‘yni saratonining oldini olish mumkinligi aytilgandi. Ta’kidlanishicha, emlash ortidan har yili 1100 ta kasallanish va bachadon bo‘yni xastaligi bo‘yicha 600 ga yaqin o‘lim holatlarining kamayishiga erishiladi.