ССВ: Ўзбекистонда 12—14 ёшли қизлар папиллома вирусига қарши эмланмоқда

Ўзбекистонда 12—14 ёшли қизлар ўртасида одам папиллома вирусига қарши эмланмоқда, деб хабар қилди Соғлиқни сақлаш вазирлиги.

Маълум қилинишича, ҳар йили Ўзбекистонда ўртача 1700 нафарга яқин аёлда одам папиллома вируси сабабли бачадон бўйни саратони касаллиги аниқланмоқда. Касалликка қарши режали эмланиш саратон ҳолатларининг олдини олишга ёрдам беради.

«Бундай вакциналар хотин-қизларнинг соғлом ва узоқ умр кўришини таъминлайди. Дунёнинг 102 мамлакатида миллий эмлаш дастурига 9 ёшдан бошлаб қизларни эмлаш киритилган. Ўзбекистон ҳам 2019 йилдан ана шу давлатлар сафига қўшилди», — дейди Санитария-эпидемиологик осойишталик ва жамоат саломатлиги хизмати бўлим бошлиғи Дилором Турсунова.

Қайд этилишича, эмлаш жараёнлари учун жойларга эҳтиёжга кўра 1 миллион 400 минг доза ОПВ вакцина ва шприцлари етказиб берилган. Бундай вакциналарнинг 270 миллиондан ортиқ дозаси дунёнинг 102 давлатида қўлланилган. Ҳозирги кунда мамлакатга Нидерландиянинг «Мерк» корхонасида ишлаб чиқарилган 1 миллион 400 минг доза «Гардасил» вакцинаси олиб келинган ва яроқлилиги текширилиб, тасдиқланган. Айни пайтда республика бўйича вакцинация жараёнлари 3138 та эмлаш пунктида амалга оширилмоқда.

Эслатиб ўтамиз, Ўзбекистонда ҳар йили бачадон бўйни саратонига чалинган икки мингга яқин аёлнинг 42 фоиздан ортиғи вафот этади.

Бундан ташқари, ОПВга қарши эмлаш орқали бачадон бўйни саратонининг олдини олиш мумкинлиги айтилганди. Таъкидланишича, эмлаш ортидан ҳар йили 1100 та касалланиш ва бачадон бўйни хасталиги бўйича 600 га яқин ўлим ҳолатларининг камайишига эришилади.