Shavkat Mirziyoyev 30-noyabr kuni “Yangi O‘zbekiston” massivlari qurilishiga oid loyiha taqdimoti bilan tanishdi. Bu haqda Prezident matbuot xizmati xabar qildi.
Ma’lum qilinishicha, 2022-yilda 22 ta yangi massiv barpo etiladi. Quruvchi tashkilotlarga yengillik berish maqsadida faqatgina ko‘p qavatli uy-joy maydonining o‘zi auksion orqali sotiladi. Tutash maydonlar esa qurilish bitganidan keyin uy-joy mulkdorlariga umumiy foydalanishga beriladi. Tadbirkorlik uchun yer uchastkalari elektron onlayn auksion orqali ajratiladi.
Qayd etilishicha, davlat rahbari yangi mavzelarda ko‘plab maktab, bog‘cha va tibbiyot muassasalari qurish bo‘yicha ko‘rsatmalar bergan. Kichik sanoat zonasi, tadbirkorlik obyektlari tashkil etish orqali kamida 50 mingta ish o‘rni yaratish mumkinligi ta’kidlangan. Hudud rahbarlari qurilishni tashkil etish rejalari yuzasidan axborot bergan.
Shavkat Mirziyoyev 2-noyabr kuni bo‘lib o‘tgan videoselektor yig‘ilishida “Yangi O‘zbekiston” mavzelari qurilishini ma’lum qilgandi. “Joylardagi saylovoldi uchrashuvlarida har bir hududda barcha iqtisodiy va ijtimoiy infratuzilmaga ega bo‘lgan ‘Yangi O‘zbekiston mavzelari’ni barpo etish, bu orqali kelgusi besh yilda 250 mingdan ziyod xonadon qurish reja qilingan”, – degan prezident.
Mavzuga doir:
- Shavkat Mirziyoyev “Yangi O‘zbekiston ma’muriy islohotlari dasturi”ni ishlab chiqish bo‘yicha topshiriq berdi
- “Yangi O‘zbekiston degani, avvalo, yangicha ishlash kerak degani. Ayniqsa, hokimlar o‘zgarishi kerak” — Shavkat Mirziyoyev
- Shavkat Mirziyoyevning “Yangi O‘zbekiston strategiyasi” nomli kitobi chop etildi
Izoh (0)