Bir guruh yaponiyalik tadqiqotchilar maymunlarning organizmidagi OIV(orttirilgan immunodefitsit virusi)ni yo‘q qiladigan vaksina yaratishga muvaffaq bo‘ldi. Bu haqda NHK agentligi xabar berdi.
Yaponiya Milliy biotibbiyot innovatsiyalari, salomatlik va ovqatlanish instituti tadqiqotchilari yangi vaksina bilan emlangan yapon makakalarining organizmiga OIVni yuborgan.
Tadqiqotchilarning so‘zlariga ko‘ra, yettita maymundan to‘rttasi kasallangan, biroq keyinchalik kasal maymunlarning organizmida virus g‘oyib bo‘lgan. Olimlarning fikricha, ushbu hayvonlarda vaksina bilan qo‘zg‘atilgan immunitet reaksiyasi OIVning yo‘qolishiga olib kelgan.
Tadqiqotchilar taxminan besh yil ichida vaksinaning klinik sinovlarini odamlarda boshlashga umid qilmoqda.
2019-yilda britaniyalik shifokorlar OIV bilan kasallangan bemorga suyak iligi ko‘chirib o‘tkazilganidan so‘ng kasallik yo‘qolganini aniqlagan edi. Transplantatsiyadan uch yil, antiretrovirus dori-darmonlarni qo‘llash to‘xtatilgandan bir yarim yil o‘tgach, bemorning testlari uning organizmida OIV yo‘qligini ko‘rsatgan.
Ko‘pchilik mutaxassislarning qayd etishicha, bu usul barcha bemorlar uchun emas. Transplantatsiya jarayoni qimmat va xavfli bo‘lib, bunday mutatsiya judayam kam odamlarda bo‘ladi.
Izoh (0)