Kanada va Britaniya olimlari guruhi tomonidan o‘tkazilgan tadqiqotlarga ko‘ra, iqlim o‘zgarishlari sabab Yer 500 yildan so‘ng yashash uchun yaroqsiz holga kelib qoladi. Mazkur tadqiqot natijalari Global Change Biology ilmiy jurnalida e’lon qilingan, deb xabar beradi “Korrespondent.net”.
Ekspertlar sayyoraning o‘zgarishiga oid uchta modelni taqdim etgan. Eng yomon ssenariyga ko‘ra, inson tur sifatida yo‘qolib ketadi.
Ularning so‘zlariga ko‘ra, bu Yerning bir qismi isish sabab yashash uchun yaroqsiz holga kelganida, qishloq xo‘jaligining qator qismi, xususan, bug‘doy va kartoshka unumdor yerlar yetishmasligi oqibatida taqchil bo‘la boshlagach sodir bo‘ladi.
“Agar global isish to‘xtatilmasa, 500 yildan so‘ng Yer shu qadar o‘zgarib ketadiki, biz omon qolish va tarixiy hamda geografik jihatdan ildiz otgan madaniyatlarimizni saqlab qolish uchun kurashishga majbur bo‘lamiz”, — deyiladi maqolada.
Shu munosabat bilan olimlar jahon hamjamiyatini falokatning oldini olish maqsadida iqlim o‘zgarishiga qarshi kurashishga chaqirmoqda.
Avvalroq Birlashgan Millatlar Tashkilotining Iqlim o‘zgarishi bo‘yicha hukumatlararo guruhi ko‘plab iqlim o‘zgarishlari doimiy bo‘lib qolishi haqida ogohlantiruvchi hisobot e’lon qilgan edi. Hisobotga ko‘ra, “kuzatilgan ko‘plab iqlim o‘zgarishlari minglab, hatto yuz ming yillar davomida misli ko‘rilmagan darajada”, boshlangan ko‘plab o‘zgarishlarni esa masalan, dengiz sathining ko‘tarilishini, “yuz ming yillar davomida qaytarib bo‘lmaydi”.
Shuningdek, olimlar Arktikada havo harorati sayyoraning boshqa mintaqalariga qaraganda tezroq qiziyotganini ma’lum qilgandi. Bu jarayon esa sayyoradagi ob-havo uchun salbiy oqibatlarga olib kelishi mumkin.
Izoh (0)