Toshkent shahrida Golden Cash store MChJ shaklidagi xorijiy korxona ta’sis etib, fuqarolarga 260 foizgacha foyda ko‘rishini va’da qilgan shaxslar ushlandi. Bu haqda Tergov departamenti xabar qildi.
Ma’lum qilinishicha, 2020-yil 15-yanvar kuni Ukraina fuqarosi 29 yoshli M.M. Toshkent shahrida MChJ tashkil etib, bir guruh shaxslar bilan til biriktirgan va korxonaning asosiy faoliyati chakana savdo bo‘lsa-da, internet orqali korxonadan tilla va kumush buyum sotib olish yo‘li bilan yillik 260 foizgacha daromad berib borishini aytib, fuqarolardan pul mablag‘larini olgan.
Qayd etilishicha, ular mijozlar oldidagi majburiyatini yangi mijozlar hisobidan yopib, respublika bo‘yicha ko‘plab fuqarolarning juda ko‘p miqdordagi pullarini qo‘lga kiritgan.
2021-yilning 17-noyabr kuni Toshkent shahar Tergov boshqarmasi Golden Cash store MChJning mansabdor xodimiga nisbatan Jinoyat kodeksining 188-1-moddasi 2-qismi “v, g” bandlari (pul mablag‘larini va (yoki) boshqa mol-mulkni jalb etishga doir noqonuniy faoliyat) bilan jinoyat ishi qo‘zg‘atilgan.
Jinoyat ishi doirasida chet el fuqarolari M.M., V.K., S.T., A.S. va X.Sh.ga 188-1-moddasi 2-qismi “v, g” bandlari bilan ayblov e’lon qilinib, har biriga nisbatan qamoqqa olish tarzidagi ehtiyot chorasi qo‘llanilgan.
Hozirda mazkur jinoyat ishi bo‘yicha fuqarolarga yetkazilgan zararni aniqlash ishlari amalga oshirilmoqda.
Mavzuga doir:
- Qashqadaryoda soxta aksiyalarni 9 mln dollarga pullab, moliyaviy piramida tashkil etgan shaxslarga jinoyat ishi qo‘zg‘atildi
- Toshkentda tadbirkorni 1 mlrd so‘mga chuv tushirgan shaxsga jinoyat ishi qo‘zg‘atildi
- Andijonda o‘zini Ispaniya banki vakili deya tanishtirib, 200 ming dollar kredit olib berish uchun pul talab qilgan shaxs ushlandi
Izoh (0)