Buxoroning Vobkent tumanidagi salkam 9 ming aholiga xizmat ko‘rsatuvchi “Paxtakor” oilaviy shifokor punktining “ahvoli qo‘rqinchli” — zax, sovuq, devorlari nuragan, ta’mirtalab ekani to‘g‘risida xabar berilgandi. Viloyat SSB “Daryo”da e’lon qilingan mazkur maqolaga rasmiy munosabat bildirib, shifoxonaning texnik holati haqiqatan ham to‘g‘ri tanqid qilinganini ma’lum qildi.
Ma’lum qilinishicha, Vazirlar Mahkamasining “2021–2023-yillarda Buxoro viloyatining Vobkent tumanini kompleks ijtimoiy-iqtisodiy rivojlantirish va kambag‘allikni qisqartirish chora-tadbirlari to‘g‘risida”gi qaroriga tumandagi QVP va OShPlarni joriy va kapital ta’mirlash rejalari kiritilgan. Shunga asosan, “Paxtakor” oilaviy shifokor punkti binosini 2022-yilda 1,5 milliard so‘mga to‘liq rekonstruksiya qilish rejalashtirilgan.
Ta’kidlanishicha, mahalliy budjet mablag‘lari hisobidan 2018-yilda 70 million so‘mga mazkur shifoxona binosining barcha derazalari va tashqaridan kirish eshiklari yangilangan. 2019-yilda mahalliy budjet mablag‘lari hisobidan 100 million so‘mga tom qismi to‘liq metall qoplamali shifer qilingan. 2020-yilda esa budjetdan tashqari mablag‘lar hisobidan 40 million so‘mga issiqlik tizimi va qozonxona yangidan o‘rnatilgan. Hozirda OShPda zamonaviy gaz hisoblagich o‘rnatilgan, qozonxona ishlab turibdi va zaxira ko‘mir bilan ham ta’minlangan.
“Kechagi tanqiddan so‘ng shoshilinch choralar ko‘rilib, hojatxona quvurlari va ichki qismlarini ta’mirlash ishlari boshlandi. Texnik tizim 10 kun muddat ichida ishga tushiriladi. Binoning issiq va sovuq suv tizimi yaroqsiz holga kelgan, chiqindi suv quvurlari avariya holatida. Bu borada ham tuman hokimligi bilan birgalikda tizimni sozlash rejasi ishlab chiqilmoqda”, — deyiladi munosabatda.
Qayd etilishicha, “Paxtakor” OShP va u yerdagi shifokorlar xizmatidan aholi mamnun, katta mablag‘ bilan bog‘liq muammolar birdaniga hal bo‘lmasligini odamlar to‘g‘ri tushungan.
“Bino atrofida obodonlashtirish va ko‘kalamzorlashtirish ishlarini amalga oshirishda qishloq odamlari va oilaviy shifokor punkti xodimlari ko‘ngilli ravishda yordam bermoqdalar. Bunda hech kimdan majburiy ravishda pul terib olinmaganligini ma’lum qilamiz”, — deya ta’kidlanadi xabarda.
Avvalroq sog‘liqni saqlash vaziri Abduhakim Xojiboyev lavozimidan ozod etilgani, shu kunning o‘zida O‘zbekiston prezidentining tegishli farmoni bilan bosh vazir o‘rinbosari lavozimida ishlab kelgan Behzod Musayev sog‘liqni saqlash vaziri etib tayinlangani to‘g‘risida xabar berilgandi. Shundan so‘ng, SSV ishchi guruhi tibbiyot tizimida yechimini kutayotgan muammo va kamchiliklarni o‘rganib, zudlik bilan bartaraf etish choralarini ko‘rishga kirishdi. Xususan, Behzod Musayev SSV tizimidagi talabga javob bermaydigan barcha sanitariya-gigiyena xonalarini ta’mirdan chiqarish bo‘yicha ko‘rsatma berdi.
Izoh (0)