Бухоронинг Вобкент туманидаги салкам 9 минг аҳолига хизмат кўрсатувчи «Пахтакор» оилавий шифокор пунктининг «аҳволи қўрқинчли» — зах, совуқ, деворлари нураган, таъмирталаб экани тўғрисида хабар берилганди. Вилоят ССБ «Дарё»да эълон қилинган мазкур мақолага расмий муносабат билдириб, шифохонанинг техник ҳолати ҳақиқатан ҳам тўғри танқид қилинганини маълум қилди.
Маълум қилинишича, Вазирлар Маҳкамасининг «2021–2023 йилларда Бухоро вилоятининг Вобкент туманини комплекс ижтимоий-иқтисодий ривожлантириш ва камбағалликни қисқартириш чора-тадбирлари тўғрисида»ги қарорига тумандаги ҚВП ва ОШПларни жорий ва капитал таъмирлаш режалари киритилган. Шунга асосан, «Пахтакор» оилавий шифокор пункти биносини 2022 йилда 1,5 миллиард сўмга тўлиқ реконструкция қилиш режалаштирилган.
Таъкидланишича, маҳаллий бюджет маблағлари ҳисобидан 2018 йилда 70 миллион сўмга мазкур шифохона биносининг барча деразалари ва ташқаридан кириш эшиклари янгиланган. 2019 йилда маҳаллий бюджет маблағлари ҳисобидан 100 миллион сўмга том қисми тўлиқ металл қопламали шифер қилинган. 2020 йилда эса бюджетдан ташқари маблағлар ҳисобидан 40 миллион сўмга иссиқлик тизими ва қозонхона янгидан ўрнатилган. Ҳозирда ОШПда замонавий газ ҳисоблагич ўрнатилган, қозонхона ишлаб турибди ва захира кўмир билан ҳам таъминланган.
«Кечаги танқиддан сўнг шошилинч чоралар кўрилиб, ҳожатхона қувурлари ва ички қисмларини таъмирлаш ишлари бошланди. Техник тизим 10 кун муддат ичида ишга туширилади. Бинонинг иссиқ ва совуқ сув тизими яроқсиз ҳолга келган, чиқинди сув қувурлари авария ҳолатида. Бу борада ҳам туман ҳокимлиги билан биргаликда тизимни созлаш режаси ишлаб чиқилмоқда», — дейилади муносабатда.
Қайд этилишича, «Пахтакор» ОШП ва у ердаги шифокорлар хизматидан аҳоли мамнун, катта маблағ билан боғлиқ муаммолар бирданига ҳал бўлмаслигини одамлар тўғри тушунган.
«Бино атрофида ободонлаштириш ва кўкаламзорлаштириш ишларини амалга оширишда қишлоқ одамлари ва оилавий шифокор пункти ходимлари кўнгилли равишда ёрдам бермоқдалар. Бунда ҳеч кимдан мажбурий равишда пул териб олинмаганлигини маълум қиламиз», — дея таъкидланади хабарда.
Аввалроқ соғлиқни сақлаш вазири Абдуҳаким Хожибоев лавозимидан озод этилгани, шу куннинг ўзида Ўзбекистон президентининг тегишли фармони билан бош вазир ўринбосари лавозимида ишлаб келган Беҳзод Мусаев соғлиқни сақлаш вазири этиб тайинлангани тўғрисида хабар берилганди. Шундан сўнг, ССВ ишчи гуруҳи тиббиёт тизимида ечимини кутаётган муаммо ва камчиликларни ўрганиб, зудлик билан бартараф этиш чораларини кўришга киришди. Хусусан, Беҳзод Мусаев ССВ тизимидаги талабга жавоб бермайдиган барча санитария-гигиена хоналарини таъмирдан чиқариш бўйича кўрсатма берди.
Изоҳ (0)