26-noyabr kuni prezident Shavkat Mirziyoyev Qozog‘istonning birinchi prezidenti Nursulton Nazarboyev bilan telefon orqali muloqot qildi. Bu haqda davlat rahbarining matbuot xizmati xabar berdi.
Suhbat avvalida O‘zbekiston prezidenti Nursulton Nazarboyevni yaqinlashib kelayotgan bayram — Qozog‘istonning birinchi prezidenti kuni bilan tabriklab, mustahkam sog‘lik, farovonlik va yangi zafarlar, birodar Qozog‘iston xalqiga bardavom taraqqiyot va ravnaq tilagan.
Nursulton Nazarboyevning zamonaviy Qozog‘istonni barpo etish, mamlakatning xalqaro maydondagi nufuzini yuksaltirishdagi tarixiy o‘rni va ulkan shaxsiy hissasi qayd etilgan.
Ikki mamlakat o‘rtasidagi do‘stlik, yaxshi qo‘shnichilik va strategik sheriklik munosabatlari bugun yuksak darajaga ko‘tarilgani mamnuniyat bilan ta’kidlangan.
“2021-yil boshidan o‘zaro tovar ayirboshlash hajmi 40 foizga oshdi, ikki mamlakatning yetakchi kompaniya va korxonalari o‘rtasidagi sanoat kooperatsiyasi kengayib bormoqda. Bugun Turkiston shahrida O‘zbekiston va Qozog‘iston hukumatlari rahbarlari ishtirokida hukumatlararo komissiyaning navbatdagi yig‘ilishi va hududlar forumi o‘tkazilmoqda”, — deyiladi xabarda.
Bundan tashqari, madaniy-gumanitar almashinuvga doir muhim dasturlarni amalga oshirish faol davom ettirilmoqda.
Telefon muloqoti chog‘ida ikki tomonlama va mintaqaviy hamkorlikning dolzarb masalalari yuzasidan fikr almashilgan, bo‘lajak oliy darajadagi uchrashuvlar rejasi ko‘rib chiqilgan.
Eslatib o‘tamiz, Nursulton Nazarboyev 2019-yil 19-mart kuni prezidentlik lavozimidan ketishi haqida e’lon qilgan va ertasi kuni davlat rahbari sifatida o‘z vakolatlaridan voz kechishi haqidagi farmonni imzolagan. Avvalroq Nazarboyev umurtqasini operatsiya qildirgani Qozog‘iston prezidenti lavozimidan ketishining sabablaridan biri ekanini tan olgandi.
Izoh (0)