Rossiyaning Kemyerovo viloyati (Kuzbass) Belovo shahridagi “Listvyajnaya” konida 25-noyabr kuni yuz bergan avariya oqibatida 50 dan ortiq odam halok bo‘ldi. 25-noyabr oqshomida rasmiylar 52 kishi — 46 nafar konchi va 6 nafar qutqaruvchi halok bo‘lganini e’lon qildi. Ular orasida shaxtadagi yong‘indan keyin yer yuzasiga chiqmagan 35 nafar kon ishchisi bor. Voqea sodir bo‘lgan paytda konda jami 285 nafar ishchi bo‘lgan, deb yozadi Meduza.
26-noyabr kuni Rossiya Favqulodda vaziyatlar vazirligi rahbari Aleksandr Chupriyan shaxtada omon qolgan bir kishi topilgani haqida xabar berdi: vazir dastlab bu odam o‘lgan deb taxmin qilingan konchi ekanini aytdi, biroq keyinroq u konchilarni qidirish vaqtida g‘oyib bo‘lgan qutqaruvchi ekanligi ma’lum bo‘ldi. Mash Siberia nashriga ko‘ra, bu odam boshqa qutqaruvchilarning oldiga o‘zi borgan, u hushida, lekin shok holatida bo‘lgan. U kasalxonaga yotqizilgan.
Aksariyat qurbonlarning jasadlari shaxtada qolmoqda — gaz portlashi xavfi tufayli qidiruv ishlari to‘xtatilgan. Rossiya FVVning ma’lum qilishicha, yer yuzasiga chiqmagan konchilar va qutqaruvchilarning kislorod yetishmasligi, zararli gazlarning yuqori konsentratsiyasi sharoitida shaxtada omon qolmagani taxmin qilinmoqda. “Teri teshiklariga so‘rilgan uglerod oksidi kondagi ishchilar uchun juda xavfli. Hatto tayyorgarlikdan o‘tgan qutqaruvchilar ham (bunday sharoitlarda) o‘zini yomon his qiladi”, — degan Kemyerovo harbiylashtirilgan kon qutqaruv otryadi komandiri Yuriy She. Odamlar is gazidan bo‘g‘ilib qolgan, deyiladi Belovskiy shahar okrugi ma’muriyatining xabarida.
Konda yuz bergan avariya oqibatida 64 kishi, jumladan, qidiruv ishlarida ishtirok etgan 12 nafar qutqaruvchi jarohat oldi. Jabrlanganlarning aksariyati — 50 kishi kasalxonaga yotqizilgan, qolganlari ambulator davolanishga yuborilgan, deya xabar bergan viloyat Sog‘liqni saqlash vazirligi. Jabrlanganlarga yonuvchi mahsulotlar va is gazidan zaharlanish, bir nafar qutqaruvchiga esa bosh jarohati tashxisi qo‘yilgan. Bemorlarda, jumladan, reanimatsiyaga yotqizilganlarda ham tiklanishning ijobiy dinamikasi kuzatilmoqda, deya ta’kidladi viloyat SVV vakili. 26-noyabr tongi holatiga ko‘ra, jarohatlangan uch nafar konchi va bir nafar qutqaruvchi reanimatsiyada.
Shaxtadagi avariya “metan-havo aralashmasining portlashi” tufayli yuz bergan, deya xabar bergan Kuzbass rahbari Sergey Sivilyev. “Katta ehtimol bilan metan portlagan bo‘lishi mumkin, portlash va dinamik zarba uchqun tushishi oqibatida yuz bergan. U tashqariga chiqishga ulgurmagan odamlarni karaxt qilgan”, — dedi Rossiya Federatsiyasi Bosh prokurori o‘rinbosari Dmitriy Demeshin. Rossiya FVV rahbari Aleksandr Chupriyan va Kuzbass gubernatori jurnalistlarga kondagi ikkinchi portlash haqida ijtimoiy tarmoqlarda tarqalgan xabarlar to‘g‘risida hech qanday ma’lumotga ega emasligini aytgan.
Voqea sodir bo‘lgunga qadar konda metanning ruxsat etilgan maksimal konsentratsiyasidan oshib ketishi qayd etilmagan, dedi “TASS”ning Rossiya texnik nazorat organlaridagi manbasi. “Maxsus qurilmalar buni qayd etmagan. Ehtimol, to‘satdan otilib chiqish yuz bergandir”, — dedi sodir bo‘lgan voqeaning bir nechta versiyalari ko‘rib chiqilayotganini ta’kidlagan agentlik suhbatdoshi.
2021-yilda “Rostexnadzor” qonunbuzarliklar tufayli “Listvyajnaya” konining ayrim uchastkalari ishini to‘qqiz marta to‘xtatgan, deya ma’lum qildi muassasaning rasmiy vakili Andrey Vil. Uning so‘zlariga ko‘ra, “Rostexnadzor” (Atrof-muhit, texnologik va yadro nazorati federal xizmati) mutaxassislari yil boshidan buyon konning turli uchastkalarida hammasi bo‘lib 127 ta tekshiruv o‘tkazgan, 914 ta qoidabuzarliklarni aniqlagan va “Listvyajnaya”ga to‘rt million rubldan ortiq (53 ming AQSh dollaridan ziyod) jarima solgan.
Halok bo‘lgan konchilardan birining rafiqasi jurnalistlarga avariyadan 10 kun oldin, 15-noyabr kuni shaxtada yong‘in sodir bo‘lganini bildirdi. “O‘n beshinchi noyabrda ular hushini yo‘qotmagan, shaxtadagi yong‘inni o‘zlari o‘chirishgan”, — dedi ayol. U shuningdek, turmush o‘rtog‘i kondagi metan darajasi “me’yordan ortiq” ekanligini aytgani haqida gapirgan.
Rossiya Tergov qo‘mitasi “Rostexnadzor” xodimlariga qarshi “odamlarning o‘limiga olib kelgan ehtiyotsizlik” bo‘yicha jinoiy ish qo‘zg‘atdi. Muassasaning Belovskiy hududiy boshqarmasidagi ikki bosh davlat inspektori voqea sodir bo‘lishidan bir hafta oldin, 25-noyabr kuni odamlar halok bo‘lgan joyning ventilyatsiya shtrekini tekshirgani to‘g‘risida dalolatnomalar tuzgan. Ammo ular aslida hech qanday tekshiruv o‘tkazmaganlikda gumon qilinmoqda. Tergov qo‘mitasi ularni hibsga olish uchun sudga murojaat qiladi.
Avvalroq Tergov qo‘mitasi xavfli ishlab chiqarish obyektlarining sanoat xavfsizligi talablarini buzish moddasi bo‘yicha jinoiy ish qo‘zg‘atgan edi. Mazkur ish doirasida kon direktori, uning o‘rinbosari va uchastka boshlig‘i qo‘lga olingan. Tergov ma’lumotlariga ko‘ra, yo‘l qo‘yilgan qoidabuzarliklar tufayli “gaz-dinamik hodisasi yuz bergan, 4-sonli uchastkaning ventilyatsiya shtrekida tutun tarqala boshlagan, natijada shaxtada bo‘lgan ishchilar bo‘g‘ilib qolgan”. Tergov qo‘mitasi qo‘lga olinganlarni qamashni so‘ramoqda.
Kon egasi halok bo‘lganlarning oilalariga ikki million rubldan (26 ming dollar) to‘lashga va’da berdi. “SDS-Ugol” kompaniyasi qurbonlarning oila a’zolari bu pullarni qonunda belgilangan to‘lovlarga qo‘shimcha ravishda olishini ma’lum qildi. Kompaniya, shuningdek, har bir jabrlanuvchiga qo‘shimcha to‘lovlar yuborishga qaror qildi, “lekin uning miqdori har bir shaxsning jarohati darajasiga qarab belgilanadi”. Ijtimoiy sug‘urta fondi konda halok bo‘lganlarning yaqinlariga “imkon qadar tezroq” har biriga bir million rubldan (13 ming dollar) to‘lashini ma’lum qildi. Mintaqaviy hokimiyat jabrlangan konchilar va kon qutqaruvchilarga, shuningdek, halok bo‘lganlarning oilalariga moddiy yordam ko‘rsatishni va’da qilmoqda (to‘lovlar miqdoriga aniqlik kiritilmagan). Rossiya prezidenti Vladimir Putin Kuzbassdagi konda ishlagan olti nafar qutqaruvchini “Jasorat” ordeni bilan taqdirlash haqidagi farmonni imzoladi: ulardan besh nafari vafot etgan.
“Listvyajnaya”dagi portlash so‘nggi 11 yil ichida Rossiya konlarida sodir bo‘lgan eng yirik avariya bo‘ldi — 2010-yilda “Raspadskaya” konida 91 kishi halok bo‘lgandi. “Listvyajnaya” konida bundan avvalgi yirik avariya 2004-yil 28-oktabrda sodir bo‘lgan, o‘shanda metan portlashi natijasida 13 kishi halok bo‘lgan. Shundan so‘ng korxonaning 9 nafar xodimi shartli jazoga hukm qilingan.
Shavkat Mirziyoyev “Listvyajnaya” konida sodir bo‘lgan portlash oqibatida insonlar qurbon bo‘lgani munosabati bilan mamlakat prezidenti Vladimir Putinga ta’ziya yo‘llagan.
Izoh (0)